ولایتي خبرونه:(بادغیس، جوزجان) د بادغیس ولایت د ماشومانو د اصلاح او روزنې مرکز ۱۰ تنه محجوزین د قرآن کریم ناظرې او نوراني قاعدې برخو څخه فارغ شول
د نوموړي زندان امر محترم ملا سید باران "عدالتي"وویل، یادو محجوزینو د محجوزیت پر مهال د دیني زدهکړو، اخلاقي روزنې او ټولنیزو مهارتونو په برخه کې لازم پروګرامونه بشپړ کړي دي، چې موخه یې د هغوی اصلاح، سالمه روزنه او بېرته ټولنې ته د چمتو کولو زمینه برابرول دي.
داراز، د یاد زندان مسوولینو وویل؛ د ماشومانو د اصلاح او روزنې مرکز هڅه کوي تر څو د ماشومانو او تنکیو ځوانانو د اصلاح ترڅنګ هغوی ته د سالم راتلونکي لپاره مناسبې روزنیزې او تعلیمي اسانتیاوې برابرې کړي.
د یادونې وړ ده، چې د بادغیس ولایت د ماشومانو د اصلاح او روزنې مرکز په دوامداره توګه د محجوزینو د اصلاح او روزنې په موخه بېلابېل تعلیمي او روزنیز پروګرامونه عملي کوي.
جوزجان:
د جوزجان والي د زندان له محبوسینو سره د خرما مرسته وکړه
د جوزجان ولایت والي محترم الحاج قاري ګل حیدر د بشري او ټولنیزې همکارۍ په دوام، د دې ولایت زندان ته د ۹۰ کارتنه خرما مرسته وکړه.
یاده مرسته د زندان ادارې ته وسپارل شوه تر څو د زندان په محبوسینو ووېشل شي.
د جوزجان ولایت د زندان امر محترم ملا عبد الباري "مخلص" د والي له دې نیک اقدام څخه مننه وکړه او ویې ویل چې دا ډول مرستې د محبوسینو د روحي وضعیت په ښه کېدو او د هغوی د لومړنیو اړتیاوو په پوره کېدو کې مهم رول لري.
د جوزجان والي محترم الحاج ګل حیدر ټینګار وکړ چې د اسلامي او انساني ارزښتونو پر بنسټ به د زندان له محبوسینو سره د مرستو او پاملرنې لړۍ دوام ولري، څو د هغوی د ژوند شرایط لا ښه شي.
رجب المرجب ۲۰/ ۱۴۴۷
د مقام د دفتر ریاست
د اطلاعاتو او عامه اړیکو امریت
