د میدان وردګ ولایت په زندان کې (۶۳) تنه زندانیان د قران کریم د حفظ، ناظرې او د حرفوي زده کړو له دورې څخه فارغ شو
په دې مراسمو کې د زندانونو چارو د سمون ادارې نظامي مرستیال محترم لوی پاسوال قاري حبیب الله "بدر" په داسې حال کې چې د ادارې د مقام د دفتر رئیس محترم قاري رحمت الله"ګلزاد" د میدان وردګ زندان امر محترم مولوي احسان الله "صلاح الدین"او یو شمېر نورو ملکي او نظامي مسوولینو هم شتون درلود نوموړو زندانیانو ته په خپلو خبرو کې له یادو د ورو څخه د فراغت مبارکي وویله او هغوی ته یې په نورو دیني، عصري، او حرفوي برنامو کې د ګډون لارښوونه وکړله.
داراز، په یادو مراسمو کې د مقام د دفتر رئیس محترم قاري رحمت الله ګلزاد په خپلو خبرو کې وویل، چې ادارې یې د کابل په ګډون د هېواد په (۳۳) ولایتونو کې د زندانیانو لپاره د دیني، عصري او حرفوي زده کړو بیلابیلې برنامې عملي کړي، څو پرمټ یې زندانیان وکولی شي له ناوړه کړنو لرې او له بنده تر ازادېدو وروسته خپلې کورنۍ او ټولنې ته د خدمت جوګه شي.
په ورته مهال، د میدان وردګ ولایت د زندان امر محترم مولوي صلاح الدین په خپلو خبرو کې وویل، چې په دې زندان کې یې زندانیانو ته د دیني، عصري او حرفوي زده کړو بیلابیلې برنامې برابرې کړي چې نن ترې (۶۵) تنو زندانیانو د قران کریم د حفظ، ناظرې او د غالۍ اوبدلو، مبایل جوړولو، کاشي کارۍ، نلدوانۍ او برېښنايي سیسټم د حرفوي شاپونو دوره بشپړه کړله.
همدا راز، یاد مراسم د دستار بندۍ او د خیر دعایې په کولو سره پای ته ورسېدل
ذوالقعده ۱۵/ ۱۴۴۶
د مقام د دفتر ریاست
د اطلاعاتو او عامه اړیکو امریت
