د کابل ولایت د څرخي پله په مرکزي محبس کې د محبوسینو ترمنځ د فوټبال سیالۍ پیل شوې
دغه سیالۍ چې د زندانونو چارو د سمون ادارې د ښوونې او بیا روزنې ریاست له لورې په لاره اچول شوي، نن (سې شنبې) په داسې حال کې چې د دې ادارې د ښوونې او بیا روزنې رئیس محترم مولوي نظرمحمد "ناصري"، د خدماتو رئیس محترم الحاج مولوي عبدالمالک "خاکسار" او یو شمېر نورو مسوولینو او مینوالو محبوسینو شتون درلود د یاد محبس د ټېمونو ترمنځ سیالۍ پیل شوه.
د زندانونو چارو د سمون ادارې د ښوونې او بیا روزنې رئیس محترم مولوي ناصري په وینا، دغه سیالۍ چې یوه میاشت وخت به ونېسي موخه ترې زندانیان له نشه يي توکو څخه ژغورل، تفریح او هغوی ترمنځ د یوې ښې سالمې فضا رامنځ ته کول دي ، څو له یوې خوا زندانیان د خپګان احساس ونه کړي او له بلې خوا ورته د ورزش زمینه برابره شي او پرمټ یې روحي او جسمي روغتیا او سلامتیا ترلاسه کړي.
داراز، د نوموړو محبس محبوسینو د یادې ادارې له رهبرۍ څخه د مننې ترڅنګ د داسې ورزشي برنامو ترسره کول، د هغوی پر جسمي او فکري روحیې لوړولو کې اغیزمن یاد کړل او د ورته نورو ګټورو ورزشي برنامو د دوام غوښتنه یې وکړه.
ربیع الثاني ۱۹/ ۱۴۴۶
د مقام د دفتر ریاست
د اطلاعاتو او عامه اړیکو امریت
