۱۰۰ تنه افغان بندیان له ایرانه افغانستان ته راولېږدول شول
د زندانونو چارو د سمون ادارې عمومي رئیس محترم مولوي محمد یوسف "مستري" د خپلو نه ستړې کېدونکو هلو ځلو په دوام، دا ځل نیمروز ته د سفر په ترڅ کې د ایران اسلامي جمهوریت سره د افغان بندیانو د لېږد په هکله د مخکینۍ هوکړې پربنسټ، تېره ورځ په داسې حال کې چې د ایران له خوا د بندیانو د لېږد مسوولینو ښاغلي عبداللهي او ښاغلي جلالي هم شتون درلود، (۱۰۰) تنه افغان بندیان چې د بېلابېلو جرمونو په تور دغه هېواد کې بندیان وو، د نیمروز پرپوله د افغانستان د نوموړي ولایت زندان ته راولېږدول شول.
په ورته وخت کې، د محترم مولوي محمدیوسف "مستري" په سپارښتنه، د نیمروز ولایت د زندان مسوولینو له خوا یاد شمېر رالېږدول شویو افغان بندیانو لپاره د ژوند لازمې اسانتیاوې برابرې شوې.
داراز، د زندانونو چارو د سمون ادارې عمومي رئیس له دغو بندیانو سره ژمنه وکړه، چې په نږدې راتلونکې کې به د هېواد عدلي او قضايي اورګانونو ته بلنه ورکړي، څو د دوی جرمي دوسیې وڅېړي، چې د یادو بندیانو د خوښۍ لامل وګرځېده او ویې ویل: « موږ په ایران کې د بند پرمهال له خپلو کورنیو بې خبره وو او هغوی هم زموږ احوال نه لره، خو اوس چې هم خپل هېواد ته راوستل شوي یوو او هم به وکولی شوو له خپلو کورنیو او دوستانو سره وګورو ډېر خوښ یوو».
دا په داسې حال کې ده، چې شاوخوا ۳ میاشتې وړاندې هم د ایران اسلامي جمهوریت له چارواکو سره د افغان بندیانو د لېږد په تړاو د یوې هوکړې له مخې، د یو شمېر ښځینه بندیانو په ګډون شاوخوا ۱۸سوه افغان بندیان د دغه هېواد له بېلابېلو زندانونو څخه د یوه شفاف بهیر په ترڅ کې راټول او د اسلام کلا بندر له لارې د هرات، نیمروز، فراه او د ځینو نورو ولایتونو زندانونو ته راولېږدول شول، څو دلته یې جرمي دوسیې د اسلامي شریعت او د افغانستان د تقنیني اسنادو پربنسټ وڅېړل او پرې فیصله وشي.
ذوالقعده ۲۳/ ۱۴۴۴
د مقام د دفتر ریاست
د اطلاعاتو او عامه اړیکو امریت
