کابل ښاروال د دې ولایت له مرکزي توقیفخونې څخه لیدنه وکړه
محترم مولوي عبدالرشید "بلوچ" په داسې حال کې چې د زندانونو چارو د سمون ادارې عمومي رئیس محترم الحاج مولوي محمدیوسف "مستري"، د کابل ولایت د توقیفخونو رئیس محترم قاري محمدګل "جیګرخون" او د یادې ادارې د څارنې او ارزونې رئیس محترم مولوي عبدالشکور "طیب" هم ورسره وو، د کابل ولایت له توقیفخونې څخه د لیدنې پرمهال له توقیفیانو سره خبرې وکړې، د هغوی وضعیت یې له نږدې وارزاوه او د زندانونو چارو د سمون ادارې څخه یې د هغوی لپاره برابرې شوې اسانتیاوې او وړاندې شوي خدمتونه وستایل.
په ورته وخت کې، د زندانونو چارو د سمون ادارې عمومي رئیس محترم الحاج مولوي محمدیوسف مستري د کابل له محترم ښاروال څخه د یاد ولایت د مرکزي توقیفخونې او توقیفانو د لیدنې له امله مننه وکړه او ویې ویل، دا اداره به تل هڅه کوي، څو زندانیانو ته په زندانونو کې د اوسېدنې په موخه خوندي او ارامه فضا رامنځته کړي او د شتو اصلاحي، روزنیزو او کسب زده کړې پروګرامونو له لارې هغوی داسې وروزي، چې تر ازادېدو وروسته د سالمو او کاسبو وګړو په توګه د ټولنې او هېواد په پرمختګ کې برخه واخلي.
ذوالحجة الحرام ۲۴/ ۱۴۴۵
د مقام د دفتر ریاست
د اطلاعاتو او عامه اړیکو امریت
