ولایتي خبرونه ( غزني- میدان وردګ- زابل) د غزني ولایت د زندان رئیس د دهیک ولسوالۍ د توقیفخونې له رغنیزو چارو څخه لیدنه وکړه
د غزني ولایت د زندان رئیس محترم قاري عبدالغني "عادل" د دې ولایت د دهیک ولسوالۍ د توقیفخونې روانې رغنیزې چارې له نږدې ولیدلې او کارکوونکو ته یې د چارو په ښه او بنسټېز ډول د ترسره کوولو سپارښتنه وکړه.
د نوموړو مسوولینو په وینا، دغه چارې د زندانونو چارو د سمون ادارې په مالي لګښت جوړېږي چې پرمټ به یې هم پرسونل ته د کار کولو ښه فضا او هم توقیفیانو ته د اوسېدو مناسبه زمینه او لازمې اسانتیاوې برابرې شي.
د یو بل خبر له مخې، د میدان وردګ ولایت د زندان مسوولین زیاتوي، په یاد زندان کې یې د ورزش مینه والو زندانیانو او پرسونل د ټېمونو ترمنځ څلور ورځینۍ دوستانه سیالۍ په لاره اچولي دي.
د نوموړو مسوولینو په وینا، د دغو سیالیو موخه د دواړو لورو ترمنځ د یوې ښې سالمې فضا رامنځ ته کول دي، څو له یوې خوا زندانیان د خپګان احساس ونه کړي او له بلې خوا ورته د ورزش زمینه برابره شي او پرمټ یې روحي او جسمي روغتیا او سلامتیا ترلاسه کړي.
په ورته وخت کې، د میدان وردګ ولایت د زندان زندانیانو د یادو دوستانه سیالیو د برابرولو له امله مسوولینو څخه د مننې ترڅنګ ژمنه وکړه چې د زندان له خوا به په نورو جوړو شویو مثبتو پروګرامونو کې هم د تل په شان برخه واخلي.
بل لور بیا، د زابل ولایت په زندان کې د اداري چارو د ښه پرمخ وړلو په موخه د رغنېزو چارو د جوړولو چارې پیل شوې.
د نوموړي زندان د مسوولینو په وینا یادې چارې چې مالي لګښت یې د زندانونو چارو د سمون ادارې له خوا ورکول کېږي، په بشپړېدو سره به یې د دې ولایت د زندان د کارکوونکو په رسمي چارو کې د خنډ او زنډ ستونزې حل او د کاري چارو ښه چاپېریال به رامنځ ته شي.
محرم الحرام ۲۳/ ۱۴۴۶
د مقام د دفتر ریاست
د اطلاعاتو او عامه اړیکو امریت
