ولایتي خبرونه(بلخ، خوست، غزني) د بلخ، خوست او غزني ولایتونو زندانونو کې د زمري د ۲۴مې د بریا عظیمې فتحې او خپلواکۍ د ورځې په مناسبت د جلا جلا پرتمینو مراسمو پرمهال لمانځغونډې ترسره شوې
په دغو مراسمو کې د یادو ولایتونو د زندانونو مسوولینو، نظامي او ملکي کارکوونکو ګډون کړی و.
په لمانځغونډو کې ویناوالو د زمري د ۲۴مې ورځې پر تاریخي اهمیت خبرې وکړې او دا یې د افغانستان د معاصر تاریخ له مهمو او برخلیک ټاکونکو ورځو څخه وبلله.
د غونډو ګډونوالو د افغانستان د خپلواکۍ او ازادۍ لپاره د افغانانو د اوږدو مبارزو او د مجاهدینو د سرښندنو او قربانیو یادونه وکړله او د هغوی د مبارزو درناوی یې وکړ.
ویناوالو وویل: « افغانانو د اسلام مبارک دين، د هېواد د خپلواکۍ، ارضي حاکمیت او د خپلې خاورې د دفاع په لاره کې سترې قربانۍ ورکړې دي».
داراز، ویناوالو زیاته کړله، د هېواد د خپلواکۍ او امنیت ساتنه د ټولو افغانانو ګډ مسوولیت دی.
په ورته وخت کې، د مراسمو ویناوالو له مسوولینو او کارکوونکو وغوښتل، څو خپلې دندې په صداقت، اخلاص او مسوولیتپذیرۍ سره ترسره کړي.
د نوموړو زندانونو مسوولینو په خپلو خبرو کې ژمنه وکړله، چې د هېواد د امنیت او ثبات ترڅنګ به د زندانیانو د اصلاح او بیا روزنې، هغوی ته د مناسب ژوند شرایطو برابرولو او د قانوني او بشري اصولو په چوکاټ کې د زندانونو د چارو د ښه تنظیم په برخه کې خپلو هڅو ته دوام ورکوي.
ربیع الاول ۳/ ۱۴۴۸
د مقام د دفتر ریاست
د اطلاعاتو او عامه اړیکو امریت
