د کابل ولایت په مرکزي توقیفخونه د فقهي درسونو لومړۍ برخه پايته ورسېده
دغه برخه، چې څه موده وړاندې د نوموړې توقیفخونې ملکي او نظامي پرسونل لپاره پیل شوې وه، نن(سې شنبې) يې له برخوالو څخه پر درسونو د پوهېدنې د ارزونې په توګه ازموینه واخیستل شوه او پايته ورسېده.
د زندانونو چارو د سمون ادارې د ښوونې او بيا روزنې رئیس محترم مولوي عبدالوارث "سادات" په دې اړه د جوړو شويو مراسمو پرمهال په داسې حال کې، چې له عدلي او قضایي اورګانونو سره د اړیکو رئیس محترم مولوي عبدالله "حقیق"، د ارشاد او دعوت رئیس محترم مولوي صدیق الله "صدیقي"، د کابل ولایت د توقیفخونو رئيس محترم قاري عبدالغني "عادل" او یو شمېر نورو دیني عالمانو هم شتون درلود، یاده ازموینه د پرسونل د هڅونې په موخه ګټوره وبلله او زیاته یې کړه، هغه ځای کې چې هلته د قرانکریم د ایتونو او د نبوي (صلی الله علیه وسلم) د احادیثو په رڼا کې خبرې کېږي، هغه د الهي(جل جلاله) له برکت او رحمت څخه ډک وي، نو لازمه ده چې د دې دورې برخوال دوی ته ورکړل شوې دیني درسونه او معلومات د خپلو کورنیو له غړو سره شریک کړي، څو هغوی یې هم له فیض او برکت څخه برخمن شي.
همدا شان، د ادارې له عدلي او قضایي اورګانونو سره د اړیکو او د کابل ولایت د توقیفخونو رئيس د دا ډول مثبتو پرګرامونو پر عملي کولو خوښي وښوده او له یاد پرسونل څخه یې وغوښتل، څو په دې درسونو کې په ډېرې لېوالتیا او اخلاص برخه واخلي او په خپل ژوند کې یې عملي کړي.
په ورته وخت کې، د نوموړي توقیفخونې ملکي او نظامي پرسونل د زندانونو چارو د سمون ادارې څخه غوښتنه وکړه، چې په راتلونکې کې هم ورته نور دا ډول پروګرامونه پلي کړي.
محرم الحرام ۱۵/ ۱۴۴۵
د مقام د دفتر ریاست
د اطلاعاتو او عامه اړیکو امریت
