د خوشې شویو بندي مجاهدینو د ستونزو د حل او هغوی سره د مرستو په موخه غونډه جوړه شوه
دغه غونډه، چې تېره ورځ د ننګرهار ولایت د اطلاعاتو او کلتور ریاست په کوربه توب او د دې ولایت د امنیې قومندانۍ د امنیتي چارو مرستیال مل پاسوال مولوي محمد طاهر "مبارز"، د ختیځ زون د خوشې شویو بندي مجاهدینو د ستونزو د حل مدیر محترم قاري ضیاالرحمن، یو شمېر ملکي او نظامي مسوولینو او د خوشې شویو بندي مجاهدینو په ګډون جوړه شوې وه، په کې د یادو مجاهدینو د ستونزو د حل او له هغوی سره د ممکنه مرستو د برابرولو په اړه خبرې اترې وشوې.
د ننګرهار د امنیې قومندانۍ د امنیتي چارو مرستیال نوموړو مجاهدینو ته په خبرو کې وویل: «د ا.ا.ا. مشران ستاسو د ستونزو د حل لپاره ځانګړې برنامې لرې، څو ستاسو په شان وړ او په کار پوه کسانو ته ځای ورکړل شي او زه هم ژمنه کوم چې د دغې قومندانۍ په تشکیل کې به ستاسو له ډلې یو شمېر مجاهیدین په دندو ځای پرځای کړم».
په ورته وخت کې، دغو مجاهدینو د ننګرهار ولایت د امنیې قومندانۍ له یادې ژمنې مننه وکړه او د ا.ا.ا. له نورو مسوولینو څخه یې هم د دوی د برخلیک روښانه کولو او ستونزو ته یې د ژر تر ژره رسېدنه غوښتنه وکړه.
د غونډې په پای کې د ختیځ زون د خوشې شویو بندي مجاهدینو د ستونزو د حل مدیر د خپلو خبرو پرمهال، د دغو مجاهدینو د ستونزو د حل ترڅنګ د دوی د حقونو رعایتولو او ورته د پام وړ اسانتياوو برابرولو په موخه ډاډ ورکړ.
شوال المکرم ۲۳/ ۱۴۴۵
د مقام د دفتر ریاست
د اطلاعاتو او عامه اړیکو امریت
