په زندانونو کې د زندانیانو لپاره د دیني او عصري علومو او روزنو د اسانتیاوو برابرولو په لړ کې دا ځل د میدان وردګو ولایت د زندان د امر محترم مولوي صلاح الدین په هڅو په نوموړي زندان کې د زندانیانو لپاره د قرانکریم د حفظ دوره پیل شوه.

دا دوره چې د دیني او قراني پوهې لرونکو استادانو له خوا پرمخ وړل کېږي، په کې هغه زندانیان ګډون کوي، چې د حفظ وړتیا او لېوالتیا ولري.

په ورته مهال، د یاد زندان د اړوندو مسوولینو په کوښښ د زندانیانو لپاره د خیاطۍ د ماشینونو او توکو سمبال یو شاپ هم پرانیستل شو، چې د مسوولینو په خبره په دې شاپ کې به د خیاطۍ حرفې مینوال زندانیان برخه اخلي.

د یادونې وړ بولو، چې د میدان وردګ ولایت په زندان کې تر دې وړاندې د غالۍ اوبدنې شاپ یا حرفوي زده کړو کارګاه شتون درلود او د دې زندان د مسوولینو په وینا، د ګډونوالو زندانیانو شمېر یې ورځ تر بلې زیاتیږي.

د یو بل خبر له مخې، د پکتیکا له زندان سره د دې ولایت د اولمپیک کمېټې له خوا د والیبال لوبې د ورزشي جامو، توپونو، جال او یو شمېر نورو اړتیا وړ توکو مرسته وشوه.

یاد توکي د نوموړې کمېټې د امر محترم ډاکټر سیرت له لورې په داسې حال کې د زندان مسوولینو ته وسپارل شوې، چې د دې  زندان د زندانیانو تر منځ د ولیبال دوستانه لوبې هم روانې وې.

د پکتیکا ولایت د زندان امر محترم مولوي محمد هاشم "حقاني" د دغو ورزشي توکو د ورسپارلو له امله د خوښۍ په څرګندولو سره وویل، ورزش د زندانیانو د سلامتیا لامل کېږي او له خپګان او د وخت له بېځایه ضایع کېدو څخه یې ژغوري، نو دوی به هڅه کوي چې په راتلونکې کې ورته لا نورې ښې زمینې برابرې کړي.

بلخوا بیا، د زندانونو چارو د سمون ادارې د عمومي رئیس محترم مولوي محمدیوسف "مستري" په سپارښتنه او د هېواد زندانونو ته د پاملرنې په لړ کې دبامیان ولایت د زندان د کارکونکو د ظرفیت لوړونې په هدف یو ورځینی سیمینار د ادارې د تجربه لرونکو ښوونکو له خوا وړاندي شو.

د بامیان د زندان مسولینو دا ډول سیمینارونه د کارکونکو د وړتیاوو لوړونې په موخه مهم یادکړل او د زندانونو چارو د سمون له ادارې یې د ورته نورو ګټورو پروګرامونو د پلي کولو غوښتنه کړې. 

دا راز، د دغه زندان د رئیس محترم مولوي محمد ابراهیم په وینا، په یاد سیمینار کې یې د دې زندان کارکونکو سره د زندانیانو د ساتنې له هغوی سره د ښه چلند، د بندیانو‌ د انتقال، د هغوی‌ د تسلیمولو‌ طریقه ‌او ورته د غوره اسانتیاوو برابرولو تر څنګ نور د اړتیا وړ مهم موضوعات شریک شول چې په راتلونکي کې به مثبتې پایلې ولري.

جمادي الثاني- ۲۵/ ۱۴۴۵

د مقام د دفتر ریاست

د اطلاعاتو او عامه اړیکو امریت