لنډ ولایتي خبرونه:( پکتیکا، بلخ )
پکتیکا:
د پکتیکا ولایت نوي امر رسماً په دنده پیل وکړ
د زندانونو چارو د سمون ادارې د رهبرۍ په سپارښتنه محترم مولوي احسان الله "صلاح الدین" د یاد ولایت د زندان پرسونل ته د نوي امر په توګه وروپېژندل شو او د خیر دعا په کولو ورته په چارو کې د بریا هیله وشوه.
په ورته وخت کې، د پکتیکا د زندان نوي امر چې رسماً یې خپل کار پیل کړ ژمنه وکړه، چې د زندانونو چارو د سمون ادارې د رهبرۍ له لورې د دې زندان د زندانیانو د خدمت په موخه به ورسپارل شوي مسوولیتونه پروخت او په پوره امانتولۍ ترسره کوي.
بلخ:
د سره صلیب نړیوالې کمېټې د بلخ ولایت له زندان سره یو اندازه روغتیايي توکو مرسته وکړه
په دې توکو کې چې د اوبو ستلونه، د حمام صابون، د غاښونو کریم او برسونه او د اړتیا وړ نور توکي شامل وو، د نوموړي ولایت د زندان پر شاوخوا (۱۵۰) تنو نارینه او ښځینه محبوسینو باندې د یادې کمېټې د ولایتي دفتر د استازو په حضور کې وويشل شول.
په ورته وخت کې، د بلخ ولایت د زندان د روغتیايي پرسونل له خوا له ساري، انتاني او په ځانګړي ډول جلدي ناروغیو څخه د خونديتوب په موخه د زندانیانو د اوسېدو ټولې خونې دوا پاشي شوې.
د زندانونو چارو د سمون اداره تل هڅه کوي څو تر خپل چتر لاندې ټولو زندانونو کې محبوسینو، تورنو او محجوزینو ته د نورو خدمتونو ترڅنګ، د هغوی روغتیا ته د جدي پاملرنې پربنسټ خوندي، پاک او سالم چاپېریال رامنځته کړي.
ذوالحجة الحرام ۸/ ۱۴۴۶
د مقام د دفتر ریاست
د اطلاعاتو او عامه اړیکو امریت
