د زندانونو چارو د سمون ادارې سرپرست او مل پلاوي يې د کابل ولایت مرکزي توقیفخونې د پایوازۍ بهیر وارزوه
د نوموړې ادارې سرپرست او د پالېسۍ او مسلکي چارو مرستیال محترم قاري عبدالله "همدرد" په داسې حال کې، چې د ادارې د کشف او اوپراتیفي رئیس محترم مولوي عطامحمد "محمد"، د نظامي چارو معاونیت د ارکان رئیس محترم پاسوال مولوي اسدالله "مولانا"، د کابل ولایت د توقیفخونو رئیس محترم قاري محمدګل "جګرخون"، ازادۍ سلب پرځایونو د څار رئیس محترم داریوش مجددي او د پالېسۍ او مسلکي چارو معاونیت د دفتر امر محترم خلیل الله "بکتاش" یي هم ملتیا کوله، د کابل ولایت د مرکزي توقیفخونې د پایوازۍ بهیر له نږدې وارزاوه او په دې ترڅ کې یې لومړی له توقیفیانو سره وکتل، د هغوی خبرې او روا غوښتنې یې وارېدې او ورته د رسېدنې په موخه یې ژمنه وکړه.
داراز، یاد پلاوي د دغې توقیفخونې له پخلنځي او روغتیايي کلینیک څخه لیدنه وکړه او له مسوولینو سره یې د هغو د نظافت، پاکوالي او روغتیايي ښه کیفیت لرونکو خدماتو د وړاندې کولو په اړه بحث وکړ او په یادو برخو کې یې ورته لازمې سپارښتنې وکړې.
له مسوولینو سره تر خبرو اترو وروسته، د محترم قاري عبدالله "همدرد" په مشرۍ پلاوي د کابل ولایت مرکزي توقیفخونې ته له یوشمېر راغلیو پایوازانو سره له نږدې وکتل او هغوی هم د زندانونو چارو د سمون ادارې له مسوولینو څخه د دوی د تګ راتګ لپاره د نقلیه وسایطو د چمتو کولو، په توقیفخونه کې د شته پلورنځي او په کې له توقیفخونې څخه بهر د بازار په بیه د توکو پلورلو او نورو اسانتیاوو برابرولو په پار مننه وکړه.
په ورته وخت کې، د زندانونو چارو د سمون ادارې د پالېسۍ او مسلکي چارو مرستیال اړوند ملکي او امنیتي پرسونل ته لارښوونه وکړه، چې خپلو مسوولیتونو ته د جدي پاملرنې تر څنګ، له پایوازانو سره خپل چلند لا نور هم ښه کړي.
جمادي الثاني-۱۷/ ۱۴۴۵
د مقام د دفتر ریاست
د اطلاعاتو او عامه اړیکو امریت
