د زندانونو چارو د سمون ادارې عمومي رئیس د سره صلیب کمېټې له مشرې سره و کتل
محترم مولوي محمد یوسف "مستري" په خپل کاري دفتر کې چې د مقام د دفتر رئیس محترم عبیدالله "اخلاص"، د اقتصادي برنامو رئیس محترم ډاکټر سیداحمد "اسحاقزی" هم ورسره وو د افغانستان لپاره د سره صلیب نړیوالې کمېټې (ای سي ار سي) له مشرې اغلې کاتارینا ریټز په مشرۍ پلاوي سره په کتنه کې د دواړو لوریو پرخپلمنځي همغږۍ زیاتولو، یو له بل سره په کډو همکاریو، تخنیکي مرستو او په زندانونو کې د مختلفو برخو کارکونکو ته د ظرفیت لوړونې په اړه بحث وکړ.
د زندانونو چارو د سمون ادارې عمومي رئیس محترم مولوي مستري د یادې کتنې په ترڅ کې د ای سي ار سي له مخکینیو مرستو مننه وکړه او هیله مندي یې وښوده چې په هېواد کې نورې ملي او نړیوالې مرستندویه موسسې دې هم له دغې ادارې سره د مرستو او کارکوونکو د ظرفیت لوړونې په موخه د کړو ژمنو عملي کولو بهیر چټک کړي.
د سره صلیب نړیوالې کمېټې پلاوي هم د خپلو همکاریو پر دوام ټینګار وکړ او له دغې ادارې څخه یې د نوموړې کمېټې له خوا زندانیانو او زندانونو ته په شفافه توګه د مرستو رسولو او ویشلو لپاره د همغږۍ او زمینې برابرولو په موخه خوښي څرګنده کړه.
جمادي الاول ۲۹/ ۱۴۴۵
د مقام د دفتر ریاست
اطلاعاتو او عامه اړیکو امریت
