د کندهار ولایت د زندان ریاست ښځینه بندیانو لپاره نوی روغتیايي کلینیک جوړ شو
دغه کلینیک، چې د یاد ولایت د زندان د ریاست د مسوولینو په هڅو او د سره صلیب نړیوالې کمېټې په مالي مرسته جوړ او ګټې اخیستنې ته وسپارل شو، تېره ورځ د نوموړي زندان د رئیس محترم ملانعمت الله "سراجي" او د دې کمېټې د استازي ډاکټر ناصري لخوا د یو لړ مراسمو په ترڅ کې پرانیستل شو.
پرطبي وسایلو سمبال دې جوړ شوي کلینیک پرمټ به، د زندان ښځینه بندیانو لپاره د ښځينه ډاکټرانو او طبي متخصصینو له خوا روغتیايي خدمتونه وړاندې کېږي.
د کندهار د زندان رئیس محترم ملانعمتالله "سراجي" په یادو مراسمو کې د خپلو خبرو پرمهال، د سره صلیب نړیوالي کمېټې له دې مرستې څخه مننه وکړه او ډاډ یې ورکړ، چې کوښښ کوي په راتلونکې کې به هم د دغه ولایت د ښځینه بندیانو لپاره نورې لازمې اسانتیاوې برابرې کړي.
رجب المرجب ۱۸/ ۱۴۴۴
د اطلاعاتو او عامه اړیکو امریت
