د کابل ولایت د مرکزي محبس پرسونل لپاره د فقهي زده کړو لومړۍ دوره پایته ورسېده
د زندانونو چارو د سمون ادارې د ښوونې او بیا روزنې ریاست له لوري د مرکزي محبس ملکي او نظامي پرسونل لپاره د فقهي زده کړو لومړۍ دوره، چې څه موده وړاندې پیل شوې وه نن(پنج شنبې) د دغې دورې ممتازو برخوالو ته د یو لړ مراسمو په ترڅ کې د ډالیو په ورکولو سره پایته ورسېده.
د ښوونې او بیا روزنې رئیس محترم مولوی عبدالوارث "سادات" د یادو مراسمو پرمهال، په داسې حال کې چې د ادارې د دعوت او ارشاد رئیس محترم مولوی صدیق الله "صدیقي" او یو شمېر دیني عالمانو هم شتون درلود، د نوموړې دورې ګډونوالو ته وویل: « خوښ یم چې تاسو په دومره لیوالتیا سره په دینې زده کړو کې ګډون کوئ ستاسو له ارزونې وروسته چې موږ کومه مثبته پایله ترلاسه کړه د ستایلو وړ ده، نو زموږ هیله ده کوم فقهي مسایل چې تاسو دلته زده کوئ له خپلو کورنیو سره هم شریک کړئ نو هم به مو ثواب زیات شي او هم به مو کورنۍ له دې زده کړو برخمنې شي.»
دا په داسې حال کې ده، چې سر له سبا به د فقهي درسونو بله دوره پیل شي او په کې به نور مهم فقهي مسایل یاد پرسونل ته ور زده کول کېږي.
محرم الحرام ۱۰/ ۱۴۴۵
د مقام د دفتر ریاست
د اطلاعاتو او عامه اړیکو امریت
