د زندانونو چارو د سمون ادارې یوه پلاوي د پروان او بغلان ولایتونو له زندانونو لیدنه وکړه
د دغې ادارې د عمومي رئیس محترم مولوي محمدیوسف "مستري" په سپارښتنه، د ادارې د کشف او اوپراتيفي رئیس محترم مولوي عطامحمد "محمد" په مشرۍ يوه پلاوي په تېرو دوو ورځو کې د پروان او بغلان ولایتونو له زندانونو څخه د لیدنې په ترڅ کې، د نوموړو زندانونو له مسوولینو سره پر اړوندو موضوعګانو خبرې اترې وکړې.
د پلاوي له خوا په یادو خبرو اترو کې مسوولینو ته د دغو زندانونو د ستونزو د حل په تړاو لازمې لارښوونې وشوې او له دوی یې وغوښتل، چې له زندانیانو سره ښه چلند ته دوام ورکړي.
داراز، پلاوي د نوموړو ولایتونو له زندانیانو سره هم وکتل او د هغوی له لورې د دوسیو ژر څېړلو ترڅنګ د هغوی نورې روا غوښتنې له نږدې واورېدې او په دې برخه کې یې یادو زندانیانو سره د چټکو ګامونو پورته کولو ژمنه وکړه.
بلخوا، د محترم مولوي عطامحمد "محمد" په مشرۍ پلاوي د پروان او بغلان د مرافعې محکمو له رئیسانو سره هم ولیدل او د يادو ولايتونو د زندانیانو د جرمي دوسیو د ژر څېړلو غوښتنه يې ورسره شریکه کړه، چې د هغوی له لورې ورته په دې اړه ډاډ ورکړ شو.
محرم الحرام ۱/ ۱۴۴۵
د مقام د دفتر ریاست
د اطلاعاتو او عامه اړیکو امریت
