د زندانونو چارو د سمون ادارې نظامي مرستیال په مشرۍ یو پلاوي پروان ولایت ته سفر وکړ
محترم لوی پاسوال قاري حبیب الله "بدر" په داسې حال کې، چې د ښوونې او بیا روزنې رئیس محترم مولوي نظر محمد "ناصري"، د شخصیتي دوسیو امر محترم مولوي فضل احمد "احمدي" او یو شمېر نورو ملکي او نظامي مسوولینو یې ملتیا کوله، نوموړي ولایت ته د خپل سفر په ترڅ کې د یاد ولایت د زندان مسوولینو سره د نوموړي زندان د امنیت او نورو اړوندو مسایلو په هکله یې خبرې اترې وکړې.
تر دې وروسته، محترم لوی پاسوال قاري حبیب الله بدر له لورې محترم مولوي محمد ابراهیم "حقاني" چې پخوا د بامیانو ولایت د زندان رئیس وو، پروان ولایت د زندان نوي رئیس په توګه مسوولینو او پرسونل ته معرفي او په چارو کې ورته د بریالیتوب هیله وکړله.
داراز، پلاوي د یاد زندان له زندانیانو سره ولیدل او هغوی ورته د خپل حالت او د زندان د مسوولینو له خوا د مناسبو خدمتونو وړاندې کولو په اړه معلومات ورکړل او هم یې ځینې غوښتنې لرلې، چې د پلاوي له لورې ورته د رسېدنې ژمنه وشوه.
همدا شان، پلاوي تر دې ليدنې وروسته د نوموړي زندان اداري او امنيتي وضعيت هم له نږدې وارزاوه او د امنیتي ټاورونو د څارلو ترڅنګ يې له امنیتي اړخه زیانمنونکي ځایونه په نښه او د هغو د امنیت لا ښه ټینګښت لپاره یې د زندان مسوولينو ته لازمې لارښوونې وکړې.
په پای کې، د زندانونو چارو د سمون ادارې نظامي مرستیال محترم لوی پاسوال قاري حبیب الله بدر په مشرۍ پلاوي د نوموړي زندان د پرسونل او زندانیانو لپاره د خوړو ، اباتې، پخلنځي، کانتین، تعمیراتي او روغتیايي چارو وضعیت له نږدې وارزاوه او د ستونزو حلولو، لازمو اسانتیاوو برابرولو او غوښتنو ته د رسېدنې په موخه اړوندو مسوولینو ته لازمې لارښوونې وکړې.
ربیع الاول ۲۷/ ۱۴۴۷
د مقام د دفتر ریاست
د اطلاعاتو او عامه اړیکو امریت
