د زندانونو چارو د سمون ادارې نظامي مرستیال د دې ادارې د نظامي ښوونې او روزنې واحد قوماندانۍ د روزنیز او مسلکي کورس له روان بهیر څخه ارزونه وکړه
د نظامي چارو مرستیال محترم لوی پاسوال قاري حبیب الله" بدر" په داسې حال کې چې د نظامي ښوونې او روزنې واحد قوماندانۍ قوماندان محترم مل پاسوال مولوي نورالله "دروېش" او یو شمېر نورو مسوولینو یې هم ملتا کوله د نظامي ښوونې او روزنې واحد قوماندانۍ د تعلیمي مرکز د روزنیز او مسلکي کورس له روان بهیر څخه ارزونه وکړه.
داراز، د نظامي چارو مرستیال محترم لوی پاسوال قاري حبیب الله" بدر" د نوموړي تعلیمي مرکز د روزنیز او مسلکي کورس د نظامي برخې ګډونوالو زده کوونکو ته په خپلو خبرو کې زیاته کړه « تل کوښښ کوو څو د ادارې ملکي او نظامي پرسونل د ښوونې او روزنې د بېلابیلو برنامو له لارې داسې وروزو چې کاري وړتیا یې لوړه او ورسپارل شوي مسوولیتونه په پوره رېښتینولۍ، صداقت او زړورتیا سره ترسره کړي.
همداشان، نظامي مرستیال د یاد کورس ګډونوالو نظامي مسوولینو ته سپارښتنه وکړه چې نظم او ډسپلین مراعات او له نظامي یونوفورم څخه په استفادې بېرته چارو ته پر ورستنېدو له زندانیانو سره لا نور هم ښه چلند وکړي، هغوی ته د دیني، عصري او حرفوي زده کړو زمینه برابره او د انساني او شرعي حقونو په خویندیتوب کې یې جدي پاملرنه وکړي، څو ټول محبوسین، تورن او محجوزین د سالمو او اصلاح شویو وګړو په توګه له خپلو کورنیو او ټولنې سره یوځای شي.
همداراز، د زندانونو چارو د سمون ادارې نظامي چارو مرستیال د نوموړي کورس له استادانو څخه وغوښتل، چې په کورس کې د ګډونوالو د ښې روزنې لپاره خپلې هلې ځلې لازیاتې او د مربوطه چارو په هکله ورته لازمې لارښوونې وکړي.
ربیع الثاني ۲۶/ ۱۴۴۶
د مقام د دفتر ریاست
د اطلاعاتو او عامه اړیکو امریت
