د زندانونو چارو د سمون ادارې له لورې د کابل او (۳۳)ولایتونو د زندانونو د ښوونې او بیا روزنې مدیرانو ته ۳ میاشتنی مسلکي کورس پیل شو
دغه کورس کې به نوموړو مدیرانو ته په مسلکي توګه د زندانیانو لپاره د اصلاحي او روزنیزو برنامو د ښه تنظیم روزنه ورکول شي.
د زندانونو چارو د سمون ادارې سرپرست او د نظامي چارو مرستیال محترم لوی پاسوال الحاج محمد کاظم "طارق" په دې اړه جوړو شویو مراسمو کې، چې د یاد معاونیت د ارکان رئیس محترم پاسوال الحاج اسدالله "مولانا"، د کشف او اوپراتيفي رئیس محترم مل پاسوال مولوي عبدالشکور"طیب"، د نظامي ښوونې او روزنې واحد قوماندانۍ قوماندان محترم مل پاسوال مولوي نورالله "دروېش" او یو شمېر نورو مسوولینو ګډون درلود، د کورس ګډونوالو ته د خبرو پرمهال وویل: « کوښښ کوو څو د زندانونو مسوولینو ته داسې ښوونیزې او روزنیزې برنامې عملي کړو، چې پر مټ یې له زندانیانو سره د لا ښه چلند او ګټورو روزنو تر څنګ، د هغوی ټول شرعي او انساني حقونه خوندي او غوره خدمتونه ورته وړاندې شي».
همداراز، د زندانونو چارو د سمون ادارې سرپرست او د نظامي چارو مرستیال د نوموړي کورس له ښوونکو وغوښتل، چې په کورس کې د ګډونوالو د ښې روزنې لپاره خپلې هلې ځلې لازیاتې او د مربوطه چارو په هکله ورته لازمې لارښونې وکړي.
محترم لوی پاسوال محمد کاظم "طارق" زیاته کړه، د ښوونې او بیا روزنې هغه مدیران چې له ولایتونو کابل ته راغلي باید خپلو ولایتونو ته په ورتګ سره سم دې کورس کې د ښوونکو له خوا چې ورته کومې روزنې ورکول شوې وي، پرمټ یې زندانیان له ناوړه کړنو لرې او اصلاحي مسایلو ته متوجه کړي.
جمادي الثاني۱۱/ ۱۴۴۷
د مقام د دفتر ریاست
د اطلاعاتو او عامه اړیکو امریت
