د زندانونو چارو د سمون ادارې رهبرۍ پلاوي د (یو این ډي پي) موسسې له رئیس سره ولیدل

د زندانونو چارو د سمون ادارې سرپرست او د پالېسي او مسلکي چارو مرستیال محترم قاري عبدالله "همدرد" نن (یکشنبې) په داسې حال کې، چې د ادارې د بشري سرچینو رئیس محترم مولوي ضیاءالرحمن "سعید"، د ښوونې او بیا روزنې رئيس محترم مولوي نظرمحمد "ناصري" او د اقتصادي برنامو او ستراتېژیکو اړیکو رئیس محترم عبیدالله "اخلاص" هم شتون درلود، په کابل کې د افغانستان لپاره د ملګرو ملتونو د پراختیایي موسسې (UNDP) له رئیس ښاغلي سټېفن راډریقویس او همکارانو  سره په کتنه کې پر اړوندو مسایلو بحث وکړ.

داراز، په دې کتنه کې د (یو این ډي پي) موسسې رئیس ښاغلي سټېفن راډریقویس د زندانونو چارو د سمون له اداې سره د همکاریو د زیاتولو تر څنګ ژمنه وکړه چې د یادې ادارې او کارکوونکو لپاره د ظرفیت لوړونې په موخه به برنامې چمتو او د ادارې د صحې، ټکنالوژۍ، خدماتو او د ښوونې او بیا روزنې د ریاستونو لپاره به د اړتیا وړ توکي برابر کړي.

داراز، د زندانونو چارو د سمون ادارې سرپرست او د پالېسي او مسلکي چارو مرستیال محترم قاري عبدالله همدرد د یادې کتنې په ترڅ کې د یو این ډي پي له  همکاریو مننه وکړه او هیله مندي یې وښوده، چې په هېواد کې نورې ملي او نړیوالې مرستندویه موسسې دې هم له دغې ادارې سره د مرستو په موخه د کړو ژمنو عملي کولو بهیر چټک کړي.

په ورته وخت کې، د ملګرو ملتونو د پراختیایي موسسې (UNDP) پلاوي هم د خپلو همکاریو پر دوام ټینګار وکړ او له دغې ادارې څخه یې د دوامدارو همغږیو په موخه خوښي څرګنده کړه.

جمادي الاول ۱/ ۱۴۴۶

د مقام د دفتر ریاست

اطلاعاتو او عامه اړیکو امریت