د زندانونو چارو د سمون ادارې د پالېسۍ او مسلکي چارو مرستیال د کابل ښوونیز مرکز کې اړوندو مسوولینو ته د جوړ شوي ښوونیز سیمینار له جریانه لیدنه وکړه
محترم الحاج محمدکاظم "طارق" نن(شنبې) په داسې حال کې چې د یادې ادارې د نظامي ښوونې او روزنې واحد قوماندانۍ قوماندان محترم مل پاسوال مولوي نورالله "دروېش"، د کابل ولایت د ښوونیز مرکز قومندان محترم سمونوال ملا محمدعالم "معتصم"، او د نظامي برخې یوشمېر نورو مسوولینو هم شتون درلود، د نوموړي سیمینار له جریانه د لیدنې پرمهال ګډونوالو ته په خپلو خبرو کې وویل، له دې فرصت او د ښوونکو له تجربو څخه په استفادې هم خپل مسوولیتونه په سمه توګه ترسره او هم دې ترلاس لاندې پرسونل خپلو مسوولیتونو ته متوجه کړي، څو یې په وینا په چارو کې نیمګړتیاوې حل او لا ښه کاري چاپېریال رامنځته ته شي.
داراز، د پالېسۍ او مسلکي چارو مرستیال زیاته کړله، زندان د مجازاتو ځای نه، بلکې د اصلاح ځای دی، نو باید کوښښ وشي چې زندانیان اصلاح شي.
هغه وویل: « د زندانیانو ساتنه او پالنه زموږ مسئولیت دی، نو باید د هغوی انساني او شرعي حقوقونو ته لازیات درناوی وشي، د زندانیانو د پایوازۍ په بهیرکې له هغوی سره ښه چلند وشي او له هغوی سره خپل چلند لا نور هم ښه شي».
د دغې لیدنې په پای کې، د یاد سیمینار ګډونوالو د زندانونو چارو د سمون ادارې د پالېسۍ او مسلکي چارو مرستیال پر نېکو سپارښتنو او خبرو خوښي وښوده او ژمنه یې وکړه، چې په سیمینار کې ټولې لارښوونې او زده کړې به په خپلو ورځنیو چارو کې په سمه توګه عملي کړي.
د یادونې وړ بولو، په دې سیمینار کې چې د زندانونو چارو د سمون ادارې د مرکزي برخو اړوندو نظامي مسوولینو لپاره د زندانیانو د ساتنې، د هغوی ستونزو ته د رسېدنې او بنسټیزو انساني او شرعي حقونو د لاښه رعایتولو په اړه د پوهاوي او وړتیا لوړونې په موخه جوړ شوی، (۱۵) ورځې به دوام ولري.
محرم الحرام ۱۶/ ۱۴۴۷
د مقام د دفتر ریاست
د اطلاعاتو او عامه اړیکو امریت
