د زندانونو چارو د سمون ادارې د مرکزي برخو یو شمېر مسوولینو ته د محجوزینو اړوند دوه ورځینی ښوونیز سیمینار جوړ شو

د ملګرو ملتونو سازمان د ماشومانو د ملاتړ صندوق یا یونسیف له خوا نن(یکشنبې) د زندانونو چارو د سمون ادارې یوشمېر امرینو او مدیرانو ته د ماشومانو د اصلاح او روزنې په مرکزونو کې د ماشومانو لپاره د عدالت، ښوونې، پاملرنې، مراقبت او له مرکز څخه د راوتلو او له ټولنې سره یې د بیا یوځای کېدو اړوندو مسایلو د څرنګوالي په هکله د ادارې د کارکوونکو د وړتیا لوړلو په موخه دوه ورځینی ښوونیز سیمینار جوړ شو.
د زندانونو چارو د سمون ادارې د پالېسۍ او مسلکي چارو مرستیال محترم قاري عبدالله "همدرد" د یاد سیمینار د پرانیستونکې وینا پرمهال په داسې حال کې، چې د دې ادارې د مقام د دفتر رئیس محترم عبیدالله " اخلاص"، کابل کې د یونیسف دفتر د ماشومانو متخصصین محترم یوچیرو یوماماتو، محترم سمېع "هاشمي" او بشیراحمد "بشارت" هم شتون درلود نوموړی سیمینار د ادارې د چارو د ښه پر مخ وړلو او د پرسونل د وړتیا لوړلو لپاره ارزښتمن وګڼه او له ګډونوالو یې وغوښتل، چې په سیمینار کې دې له زه کړو مسایلو او ترلاسه کړو معلوماتو څخه د اصلاح او روزنې په مرکزونو کې د محجوزو ماشومانو د ښې ساتنې لپاره ډېره ګټه واخلي.
داراز، کابل کې د یونیسف دفتر د ماشومانو د ساتنې متخصص ښاغلي یوچیرو یاماماتو (Yuichiro Yamamoto) د زندانونو چارو د سمون ادارې څخه مننه وکړه، چې د محجوزینو ماشومانو د حقونو رعایتولو، د هغوی ښې پالنې او ساتنې په برخه کې ورسره پوره همغږي لري.
ښاغلي یاماماتو زیاته کړه، چې یونیسف له دغې ادارې سره اوږد مهالې همکارۍ ته ژمن دی او ډاډ یې ورکړ چې په راتلونکې کې به د ولایتونو د اصلاح او روزنې مرکزونو مسوولینو ته هم د ورته سیمینارونو له لارې د محجوزینو ماشومانو په اړه عامه پوهاوی او ښوونه وکړي. 
د زندانونو چارو د سمون اداره، د اصلاح او روزنې مرکزونو د ماشومانو د ښې روزنې او اصلاح لپاره د همکارو موسسو او بنسټونو ورته همکارۍ ستايي او د هغو د دوام هیله لري. 

ذوالحجه ۲۸/ ۱۴۴۴
د مقام د دفتر ریاست
د اطلاعاتو او عامه اړیکو امریت