د زندانونو چارو د سمون ادارې د داخلي تفتیش ریاست لپاره نوی رئیس په دنده وګومارل شو
د زندانونو چارو د سمون ادارې د رهبرۍ په وړاندیز او د ا.ا.ا د ریاست الوزرا د عالي مقام په منظورۍ د ادارې د داخلي تفتش ریاست لپاره نوی رئیس په دنده وګومارل شو.
په دې اړه په جوړو شویو مراسمو کې، چې د ادارې د پالېسۍ او مسلکي چارو مرستیال محترم قاري عبدالله"همدرد"، د مالي او اداري عمومي رئیس محترم مولوي عبدالهادي "مالي اخندزاده"، د مقام د دفتر رئیس محترم عبیدالله "اخلاص"، د خدماتو رئیس محترم مولوي عبدالمالک "خاکسار"، د ښوونې او بیا روزنې رئیس محترم مولوي عبدالوارث "سادات"، د مالي او حسابي رئیس محترم حکمت "مشل" او یوشمېر نورو مسوولینو هم شتون درلود، محترم مولوي فضل احمد "احمدي" د داخلي تفتیش د نوي رئیس په توګه کارکوونکو ته وپېژندل شو.
داراز، محترم قاري عبدالله "همدرد" د یادو مراسمو پرمهال خپلو خبرو کې وویل، په ادارو کې تغییر او تبدیل راځي چې موخه ترې د چارو ښوالی او پرمختګ دی نو هیله ده چې په دې برخه کې ښې لاسته راوړنې ولرو.
همداشان، نوموړي د تفتیش د پخواني رئیس تېر خدمتونه او لاسته راوړنې وستایلې او له نوي رئیس څخه یې د اړوندو چارو د ښه پرمخ وړلو لپاره نه ستړې کېدونکو هلوځلو ته د دوام تر څنګ د دې ریاست کارکوونکو ته د خپلو امرینو د اطاعت او د اداري چارو د ښه پرمختګ لپاره په ګډه د همکارۍ سپارښتنه وکړه.
په ورته وخت کې، د ادارې د داخلي تفتیش نوي رئیس محترم مولوي فضل احمد احمدي د زندانونو چارو د سمون ادارې له رهبرۍ څخه پر هغه د باور کولو مننه وکړه او زیاته یې کړه چې موخه مې خپل هېواد ته خدمت کول دي، نو په دې برخه کې د مشرانو اطاعت کوم او راسپارل شوي مسوولیتونه به په پوره رېښتینولۍ او امانتدارۍ سرته رسوم.
ربیع الثاني ۲۳/ ۱۴۴۵
د مقام د دفتر ریاست
د اطلاعاتو او عامه اړیکو امریت
