د بلخ ولایت د زندان (۱۶۳) تنه نظامي پرسونل له یومیاشتیني ښوونیز او مسلکي کورس څخه فارغ شول
په یاد کورس کې، چې د دې زندان افسرانو، ساتنمنانو او ساتونکو برخه اخیستې وه، د عسکري زده کړو اوصولنامې، اخلاقي مقرراتو، تلاشۍ مهارتونو، د بیړنیو پېښو پر وړاندې چمتوالی، د زندانیانو موجودي، د لومړنیو روغتیایي مرستو، پولیسي تکتیکونو، د زندانیانو د بلوا او شورش د کابو کولو، د زندانیانو د انساني او شرعي حقونو رعایتولو او د نظامي نظم او ډېسپلین په پام کې نیولو اړوند لازمې مسلکي زده کړې او روزنې ورکول شوې.
د بلخ ولایت د زندان رئیس محترم حافظ عبدالرحمن "همت" په همدې اړه د جوړشویو مراسمو په ترڅ کې یاد ښوونیز او مسلکي کورس د زندان د پرسونل لپاره د مهارت او پوهې په لوړولو کې مهم وباله او له نوموړو افسرانو، ساتنمنانو او ساتونکو څخه یې وغوښتل، چې ورکړل شویو زده کړو څخه په راتلونکې کې ښه ګټه پورته کړي، څو هم الله (ج) او هم د هغه بندهګان ترې راځي شي.
همدا راز، یاد مراسیم د نوموړي کورس ۵۲ افسرانو، ۳۸ ساتنمنانو او ۷۳ ساتونکو د فراغت د سندونو په ورکړې سره پای ته ورسېده.
ذوالحجه ۸/ ۱۴۴۴
د مقام د دفتر ریاست
د اطلاعاتو او عامه اړیکو امریت
