د بامیان ولایت زندان لپاره نوی نظامي مدیر وټاکل شو
د زندانونو چارو د تنظیم ادارې عمومي رئیس محترم الحاج مولوي محمدیوسف "مستري" په سپارښتنه د یو لړ مراسمو په ترڅ کې محترم ملا رحمت الله "محمد" د بامیان ولایت د زندان نظامي مدیر په توګه د یاد زندان ملکي او نظامي پرسونل ته معرفي او په چارو کې ورته د بریالیتوب هیله وشوه.
په دې اړه جوړو شویو مراسمو کې، د یادې ادارې د کارکوونکو چارو رئیس محترم مولوي ضیاألرحمن "سعید" په داسې حال کې، چې د داخلي پلټنې رئیس محترم الحاج ډاکټر غوث الدین "سیف"، د کشف او اوپراتېفي رئیس محترم مل پاسوال مولوي عبدالشکور"طیب" او د یاد ولایت د زندان رئیس محترم مولوي عبد الرحیم "احمد" کډون درلود، د نوموړي ولایت د زندان د مخکېني امنیتي مسوول کړنې وستایلې او د یاد زندان له نظامي پرسونل څخه یې له اوسني مسوول سره د همکارۍ او په ګډه د چارو ښه پرمخ وړلو غوښتنه وکړله.
په ورته وخت کې، د یاد زندان نوي نظامي مدیر د زندانونو چارو د تنظیم ادارې له رهبرۍ څخه پر هغه د باور کولو د مننې ترڅنګ ژمنه وکړله، چې د ادارې له لوري ورسپارل شوي مسوولیتونه به په پوره رېښتینولۍ سره ترسره او د زندانونو د لا ښه امنیت په ساتنه کې به نه ستړې کېدونکې هلې ځلې کوي.
صفر المظفر ۴/ ۱۴۴۸
د مقام د دفتر ریاست
د اطلاعاتو او عامه اړیکو امریت
