د کندهار ولایت په زندان کې د ساري ناروغیو د تشخیص او درملنې ۱۲ بستریز روغتیايي مرکز پرانیستل شو
دغه مرکز، چې د کندهار د زندان د مسوولینو په هڅو او د دغه ولایت د عامې روغتیا ریاست له خوا د بې پولې ډاکټرانو موسسې په مالي لګښت د یو لړ مراسمو په ترڅ کې پرانیستل شو، په کې به د کندهار په زندان کې دننه د زندانیانو لپاره د نري رنځ او نورو ساري ناروغیو تشخیص او درملنه کېږي.
په دې مراسمو کې د کندهار د مرکزي زندان رئیس ملانعمتالله (سراجي) وویل؛ یاد مرکز د زندانیانو د نري رنځ او ساري ناروغیو د تشخیص او درملنې لپاره خورا مهم مرکز دی، چې د دې مرکز په پرانیستل کېدو سره به د زندانیانو درملنه په ښه ډول وشي او د خپلو خبرو په وروستیو کې یې زیاته کړه؛ اداره یې د ملاتړ کوونکو موسسو په مټ هڅه کوي، چې یاد روغتیايي مرکز نور هم معیاري کړي.
په پای کې د مرکزي زندان د روغتیا د برخې آمر سیدعبدالقاهر(عابد) وویل؛ د درملنې دغه روغتیايي مرکز چې ۱۲ بستره لري، د هغه زندانیانو درملنه به د مسلکي ډاکټرانو په مټ په کې په ښه ډول وشي چي د یادو ناروغیو له امله رنځ وړي.
د یاد مرکز ودانۍ په ۲۰۱۸م کال کې د سره صلیب نړیوالې کمېټې له لوري جوړه شوې وه؛ خو د نه پاملرنې او یوشمېر نورو ستونزو له کبله یې چارې درېدلې وې؛ له نېکه مرغه د بېپولي ډاکټرانو موسسې له لوري یې بیرته د بیا رغونې چارې ترسره شوې، د دې ادارې روغتیايي پرسونل هلته مخکې له مخکې ځای پر ځای شوي او د زندانیانو د نري نرځ او ساري ناروغیو د تشخیص او درملنې چارې به مخته وړي.
شعبانالمعظم ۱۳/ ۱۴۴۴
د اطلاعاتو او عامه اړيکو امرىت
