د زندانونو چارو د تنظیم ادارې د نظامي چارو مرستیال په مشرۍ پلاوي د کابل ولایت د ماشومانو د اصلاح او روزنې مرکز ارزونه وکړله
د دغې ادارې د نظامي چارو مرستیال محترم لوی پاسوال الحاج محمد کاظم "طارق" په مشرۍ پلاوي د کابل ولایت د ماشومانو د اصلاح او روزنې مرکز څخه د لیدنې پرمهال په داسې حال کې، چې د دغه مرکز رئیس محترم مولوي عطا محمد"محمد" هم شتون درلود، په یاد مرکز کې له کارکوونکو سره وکتل او هغوی ورته له خپله اړخه د دې مرکز او محجوزینو لپاره د برابروشویو امکاناتو، مرستو او وړاندې شویو خدمتونو په اړه لازم معلومات ورکړل.
همداشان، د زندانونو چارو د تنظیم ادارې نظامي مرستیال د نوموړي مرکز له محجوزینو سره هم له نږدې ولیدل، د هغوی غوښتنې یې واورېدې او د رسېدنې په موخه یې د یاد مرکز مسوولین متوجه کړل.
همداډول، پلاوي د دې مرکز د محجوزینو لپاره د خوړو (اعاشې)، اباتې، پخلنځي او روغتیايي چارو وضعیت له نږدې وارزاوه او د شتو نیمګړتیاوو د بشپړولو او حل ترڅنګ یې د هغوی د نظافت په پام کې نیولو او د لاښو چوپړتیاوو برابرولو په موخه اړوندو مسولینو ته د پام وړ لارښوونې وکړې.
همداشان، د نظامي چارو مرستیال محترم لوی پاسوال الحاج محمد کاظم "طارق" او مل پلاوي یې د نوموړي زندان د خوړو، اباتې، د برېښنايي، تعمیراتي او روغتیايي چارو په جلا جلا توګه د لیدنې ترڅنګ یې د امنیتي ټاورونو، قراولونو، پوستو او نورو امنیتي برخو وضعیت له نږدې وارزاوه او شته نېمګړتیاوې یې په ګوټه او د حل په موخه یې اړوندو مسوولینو ته لازمې سپارښتنې وکړې.
صفر المظفر۲۸/ ۱۴۴۸
د مقام د دفتر ریاست
د اطلاعاتو او عامه اړیکو امریت
