د زندانونو چارو د سمون ادارې عمومي رئیس د مرکزي برخو د پرسونل او زندانیانو پخلنځي څخه ليدنه وکړه
محترم مولوي محمد یوسف "مستري"، د ادارې د نظامي چارو د معاونیت د ارکان رئیس محترم پاسوال الحاج اسدالله "مولانا" او د کشف او اوپراتیفي رئیس محترم مولوي عطا محمد "محمد" د ادارې له بېلابېلو چارو څخه د ارزونې په ترڅ کې دا ځل کابل کې د مرکزي ریاستونو او برخو د ملکي او نظامي پرسونل او زندانیانو لپاره د پخلنځي له وضعیت څخه لیدنه وکړه.
د زندانونو چارو د سمون ادارې عمومي رئیس په دې لیدنه کې، د یاد پخلنځي د غذايي توکو د کیفیت او د پخولو د څرنګوالي په اړه له اړوندو مسوولینو او پخوونکو سره خبرې وکړې او هغوی هم په دې اړه ورته لازم معلومات وړاندې کړل.
محترم مولوي محمد یوسف "مستري" د یادو معلوماتو تر اورېدو وروسته نوموړو مسوولینو او پخوونکو ته د خوړو د کیفیت د لاښه کولو او د پاکۍ او نظافت پر پام کې نیولو باندې ټینګار وکړ او ویې ویل: « دا زمونږ او ستاسو ټولو مسوولیت دی چې په دې پخلنځي کې له چمتو شویو خوړو څخه استفاده کوونکو په ځانګړې توګه زندانیانو ته د لا ښو خدماتو وړاندې کولو په موخه لازمې اسانتیاوې برابرې کړو، څو الله(ج) او د هغه بنده ګان راڅخه راضي شي.»
د زندانونو چارو د سمون ادارې رهبري او مسوولین، تل د هېواد د ټولو ولایتونو د زندانونو د بېلابېلوبرخو د وضعیت ارزول، د مثبتو چارو غښتلتیا او ستونزو ته یې پروخت رسېدنه خپل مسوولیت ګڼي او په دې لاره کې خپلو هڅو ته دوام ورکوي.
رجب المرجب-۶/ ۱۴۴۵
د مقام د دفتر ریاست
د اطلاعاتو او عامه اړیکو امریت
