د زندانونو چارو د سمون ادارې عمومي رئیس په دوحه کې د افغانستان لپاره د بریټانیا شارزدافیر سره وکتل
د دې ادارې عمومي رئیس محترم الحاج مولوي محمد یوسف "مستري" په داسې حال کې چې د ادارې د مقام د دفتر رئیس محترم قاري رحمت الله " ګلزاد "، د اقتصادي برنامو او ستراتېژیکو اړیکو رئیس محترم عبیدالله "اخلاص"، د روغتیا رئیس محترم ډاکتر سید احمد "اسحاقزی" او د ادارې د مقام سکرتر محترم ډاکتر محمد عوض خپلواک هم ورسره وو، په دوحه کې د افغانستان لپاره د بریتانیا شارزدافیر رابرټ چاټرټن ډکسن اومل پلاوي سره په خپل کاري دفتر کې وکتل.
په دې کتنه کې دواړو لوریو د زندانیانو لپاره د روغتیا، روغتیایي تجهیزاتو، او زندانیانو ته د خوړو، ښوونې او روزنې او حرفوي زده کړو په اړه خبرې اترې وکړې.
دا راز، محترم الحاج مولوي محمد یوسف مستري د بریټانیا شارزادفیر په مشرۍ راغلي پلاوي ته د ښه راغلاست ویلو ترڅنګ زیاته کړله، د نوموړې ادارې اړوندو په ټولو زندانونو کې د زندانیانو شرعي، انساني او بشري حقونه خوندي دي او د هغوي لپاره پر زده کړو سربیره د ژوندانه ټولې اسانتیاوې برابري کړي دي.
د رابرټ چاټرټن ډکسن په مشرۍ پلاوي له دغې ادارې څخه د نړېوالو بنسټونو سره د همکارۍ او زندانیانو ته د ښو خدماتو وړاندې کولو، د ښې همغږۍ او زمینې برابرولو په موخه خوښي څرګنده کړله او د یادې ادارې سره یې د خپلو همکاریو د دوام ډاډ ورکړ.
همداشان، په دوحه کې د افغانستان لپاره د بریټانیا شارزدافیر په مشرۍ پلاوي چې د زندانونو چارو د سمون ادارې عمومي رئیس یې هم ملتیا کوله، د کابل ولایت مرکزي توقیفخونې د پخلنځي څخه لیدنه وکړله او توقیفانو لپاره د چمتو شویو خوړو د کیفیت له اړخه د مسوولینو ستاینه وکړله.
ذوالقعده الحرام ۲۱/ ۱۴۴۶
د مقام د دفتر ریاست
د اطلاعاتو او عامه اړیکو امریت
