د کابل ولایت په مرکزي محبس کې نوې ګومارنې ترسره شوې
د زندانونو چارو د سمون ادارې د عمومي رئیس محترم مولوي محمدیوسف "مستري" په سپارښتنه او اړتیا ته په کتو سره سم د کابل ولایت په مرکزي محبس کې نوې ګومارنې ترسره شوې.
په دې اړه په جوړو شویو مراسمو کې، چې د ادارې د بشري سرچینو رئیس محترم مولوي ضیاءلرحمن"سعید"، د کابل ولایت د مرکزي محبس رئیس محترم مولوي خالقداد "رحمت"، د نظامي ښوونې او روزنې واحد قوماندانۍ قوماندان محترم مل پاسوال مولوي شرافت الله "حقاني" او یو شمېر نورو ملکي او نظامي مسوولینو شتون درلود، محترم مولوي اسدالله د سمونوالۍ په بست کې د کابل ولایت د مرکزي محبس د اوپراسیون د امر او محترم مولوي شفیع الله "شفق" د سمونوالۍ په بست کې د کشف او اوپراتېفي د مدیر په توګه، خپل پرسونل ته وپېژندل شول.
په ورته وخت کې، د کابل ولایت د مرکزي محبس رئیس محترم مولوي خالقداد رحمت د یادو مراسمو پرمهال خپلو خبرو کې وویل، په ادارو کې تغییر او تبدیل یو اصل دی چې موخه ترې د کارونو ښه والی او پرمختګ دی نو هیله ده چې په دې برخه کې له نوموړو مسوولینو څخه په چارو کې ښې لاسته راوړنې ولرو.
همداشان، محترم مولوي رحمت له مخکینيو مسوولینو څخه مننه وکړه او د هغو تېر خدمتونه او لاسته راوړنې یې وستایلې او له نویو ګومارل شویو مسوولینو څخه یې وغوښتل چې د اړوندو چارو د ښه پرمخ وړلو لپاره نه ستړې کېدونکو هلوځلو ته دوام ورکړي.
په پای کې، نویو ګومارل شویو مسوولینو رسماً خپل کار پیل او ژمنه یې وکړه چې د زندانونو چارو د سمون ادارې د رهبرۍ له لورې ورسپارل شوي مسوولیتونه به پروخت او په پوره امانتولۍ ترسره کوي.
ذوالقعدة الحرام ۲۷/ ۱۴۴۵
د مقام د دفتر ریاست
د اطلاعاتو او عامه اړیکو امریت
