ولایتي لنډ خبرونه: (بغلان، میدان وردګ، بامیان) د بغلان د زندان نظامي مرستیال او مل پلاوي یې تېره ورځ د نوموړي ولایت د مرکزي بغلان ولسوالۍ له توقیفخونې څخه د لیدنې پرمهال د یادې توقیفخونې له مسوولینو سره پر اړوندو مسایلو خبرې وکړې
دا راز، نوموړي د یادې ولسوالۍ د توقیفخونې له توقیفیانو سره هم ولیدل او هغوی له نوموړي پلاوي څخه د دوی د وضعیت او حال د پوښتنې له امله د مننې تر څنګ، د خپلو جرمي دوسیو د ژر څېړلو غوښتنه وکړه، چې د پلاوي له لورې د هغوی دې غوښتنې ته د رسېدنې، د هغوی د شرعي ا وانساني حقونو رعایتولو او ورته د لازمو اسانتیاوو د برابرولو ژمنه وشوه.
په ورته وخت کې، نوموړي پلاوي د دې توقیفخونې له مسوولینو سره په خبرو کې زیاته کړه: « دا زموږ او ستاسو ګډ مسوولیت دی چې د زندانیانو د ساتنې، بیا روزنې او هغوی ته د اسانتیاوو برابرولو په موخه ځانګړې پاملرنه وکړو».
میدان وردګ
د یو بل خبر له مخې، د میدان وردګ د زندان د امریت له خوا د یاد ولایت د ولسوالیو د توقیفخونو مسوولینو ته یو ورځینی ښوونیز او روزنیز سیمینار جوړ شو، چې په کې د ګډونوالو د وړتیا لوړلو، د توقیفخونو د امنیت ساتنې، د توقیفیانو لپاره د خوندي چاپېریال رامنځته کولو او د چارو ښه والي په موخه هر اړخېز معلومات ورکړل شول.
د میدان وردګ ولایت د زندان مسوولین دا ډول پروګرامونه د دې زندان او توقیفخونو د ملکي او نظامي پرسونل د وړتیا لوړونې لپاره ګټور وبلل او له ګډونوالو یې وغوښتل، څو په دې سیمینار کې له ترلاسه کړیو معلوماتو او روزنو څخه د خپلو چارو په عملي برخه کې ښه ګټه واخلي.
بامیان
بل لور بیا، د بامیان د زندان ملکي او نظامي پرسونل ته هم د جوړ شوي یو ورځيني سیمینار په ترڅ کې د هغوی د ظرفیت لوړونې او د کارونو ښه پرمخ وړلو اړوند روزنه ورکړل شوه.
د نوموړي زندان مسوولین وايي، په یاد سیمینار کې د ورکړل شوې روزنې پربنسټ به د دې زندان د پرسونل په چارو کې مثبت بدلون راشي.
شوال المکرم ۲۷/ ۱۴۴۵
د مقام د دفتر ریاست
د اطلاعاتو او عامه اړیکو امریت
