د زندانونو چارو د سمون ادارې د پالېسۍ او مسلکي مرستیال د کابل ولایت د څرخي پله له ښځینه محبس څخه لیدنه وکړه
د زندانونو چارو د سمون ادارې د پالېسۍ او مسلکي چارو مرستیال محترم قاري عبدالله "همدرد" په داسې حال کې، چې له عدلي او قضایي اورګانونو سره د اړیکو رئیس محترم مولوي عبدالله "حقیق"، د کشف او اوپراتیفي رئیس محترم مولوي عطامحمد "محمد"، د شخصیتي دوسیو امر محترم مولوي عبدالقیوم او د پالېسۍ او مسلکي چارو د معاونیت د دفتر امر محترم خلیل الله"بکتاش" یې هم ملتیا کوله، د کابل ولایت د څرخي پله ښځینه محبس ته ولاړ او هلته یې له مسوولینو سره د ښځینه محبوسینو په بلاکونو د عمر او جرم له مخې د تقسیم بندۍ او د هغوی لپاره د برابرو شویو اسانتیاوو او ځینو ستونزو د حل په اړه خبرې اترې وکړې.
محترم قاري همدرد د نوموړي محبس د یو شمېر برخو د ارزونې ترڅنګ د تشکیل لیست هم وارزوه او له هغه وروسته یې مسوولینو ته لارښوونه وکړه څو ورسپارل شوي مسوولیتونه په پوره ریښتینولۍ سره ترسره کړي.
په ورته وخت کې، نوموړي د دې محبس مسوولینو ته په خبرو کې د محبوسو میندو د ماشومانو لپاره د ښوونې او روزنې ترخوا د لوبيز توکو او غوره چاپېریال د رامنځ ته کولو سپارښتنه وکړه.
په پای کې، د یاد محبس مسوولینو د زندانونو چارو د سمون ادارې د پالېسۍ او مسلکي چارو مرستیال محترم قاري عبدالله "همدرد" سره د محبوسینو روا غوښتنې هم شریکې کړې چې د نوموړي له خوا ورته د ژر رسېدنې ژمنه وشوه.
جمادي الاول ۱۶\ ۱۴۴۵
د مقام د دفتر ریاست
د اطلاعاتو او عامه اړیکو امریت
