ولایتي خبرونه (نورستان، هرات) د نورستان ولایت په زندان کې لسګونو تنو زندانيانو ته د خياطۍ درې مياشتنۍ عملي زده کړې پيل شوې
د یاد ولایت د تخنيکي او مسلکي زده کړو امريت له لوري د نورستان مرکزي زندان له مسولينو سره په همغږۍ زندانيانو ته د خياطۍ عملي زده کړې پيل شوې.
په همدې موخه جوړو شويو مراسمو کې د نورستان مرافعې او د شهري محکمو رئيسانو، د زندان امر، يو شمير ځایي مسوولينو او زندانيانو ګډون درلود.
د تخنيکي او مسلکي زده کړو امر وويل؛ په بېلابیلو برخو کې د نورستان ولسونو ته د حرفوي زده کړو لنډمهاله کورسونه په لاره اچولي چې داځل يې د زندان د مسوولينو په غوښتنه (۶۱) تنو زندانيانو ته د خياطۍ عملي زده کړو زمينه برابره کړله.
د غونډې ګډونوالو په خپلو خبرو کې د زندان له مسوولينو مننه وکړله چې د زندانيانو د روزنې لپاره هلي ځلې کوي او د نه ستړې کېدونکو هڅو په برکت، نن زندانونه د زدهکړې، اصلاح او د روزنې په مرکزونو بدل شوي .
د یو بل خبر له مخې، د هرات ولایت د زندان د اصلاح او روزنې مرکز له محجوزینو سره د (یونیسف) موسسې له لورې د حفظ الصحې توکو مرسته وشوه
یاده مرسته، د اقتصادي برنامو او ستراتیژیکو اړیکو ریاست په همغږۍ، چې په کې شامپو، ځان پاک، د کالیو مینځلو تشتونه، سطلونه او یو شمېر نور د اړتیا وړ توکي شامل ول، د یاد زندان مسوولینو له لورې د نوموړې موسسې د استازو په حضور کې پر محجوزینو باندې وویشل شول.
داراز، د نوموړي زندان مسوولینو د یونیسف موسسې له مرستو څخه د مننې ترڅنګ راتلونکي کې هم د ورته مرستو د دوام غوښتنه وکړله.
ربېع الاخر ۶/ ۱۴۴۷
د مقام د دفتر ریاست
د اطلاعاتو او عامه اړیکو امریت
