د هرات ولایت په ښځینه زندان کې د ښځینه محبوسینو د ملاتړ، بوختیا او حرفوي مهارتونو د پیاوړتیا په موخه د کیک او شیرنیو پخولو شاپ پرانېستل شو
د دې ولایت د زندان مسوولینو وویل، یاد شاپ د دې لپاره جوړ شوی چې ښځینه محبوسینې وکولی شي د پخلي او خوږو توکو جوړولو په برخه کې عملي تجربه ترلاسه او له همدې لارې خپل اقتصادي او مسلکي ظرفیتونه لوړي کړي.
مسوولین زیاتوي، دا ډول پروګرامونه د محبوسینو د اصلاح، روزنې او بېرته ټولنې ته د ادغام لپاره مهم ګامونه دي، چې نه یوازې د هغوی پر رواني وضعیت مثبت اغیز لري، بلکې راتلونکې لپاره هم د کار زمینه برابروي.
په ورته وخت کې، یو شمېر ښځینه محبوسینو د دغه شاپ له پرانېستې هرکلی وکړ او دا یې د خپل ځان بسیاینې او مهارت زده کړې لپاره یو مهم فرصت وباله.
شوال المکرم ۲۵/ ۱۴۴۷
د مقام د دفتر ریاست
د اطلاعاتو او عامه اړیکو امریت
