د زندانونو چارو د سمون ادارې عمومي رئیس کابل کې د یوناما دفتر له يوه پلاوي سره وليدل
محترم مولوي محمد یوسف "مستري" نن(پنجشنبې) د ملګرو ملتونو سازمان د مرستندویه ماموریت(یوناما) دفتر څخه د ښاغلي جان لوکه بهټل په مشرۍ د بشري حقونو برخې له راغلي پلاوي سره په خپل کاري دفتر کې ولیدل.
دواړه لورو په دې لیدنه کې، له يادې ادارې سره د يوناما پر مرستو، په زندانونو کې د بندیانو د ژوندانه د وضعیت، د هغوی د بشري حقونو او په دې وروستيو کې له ایرانه افغانستان ته د رالېږدول شویو بندیانو په اړه هراړخيزې خبرې اترې وکړې.
په ورته وخت کې، د زندانونو چارو د سمون ادارې عمومي رئیس محترم مولوي محمد یوسف "مستري" له يوناما دفتر څخه راغلي پلاوي سره د زندانیانو لپاره د دې ادارې له خوا په ټولو زندانونو کې د لازمو امکاناتو، اسانتياوو او خدمتونو وړاندې کولو، د هغوی د جرمي دوسيو پروخت څېړلو او تعقيبولو او د هغوی د خوشې کولو په اړه معلومات شريک کړل، چې د نوموړي پلاوي مشر ښاغلي جان لوکه بهټل د يادو معلوماتو تر اورېدو وروسته د دغې ادارې له مثبتو هڅو د مننې ترڅنګ، دې ادارې سره په بېلابېلو برخو کې د هر راز مرستو ژمنه وکړه.
شوال المکرم ۲۱/ ۱۴۴۴
د مقام د دفتر ریاست
د اطلاعاتو او عامه اړیکو امریت
