د زندانونو چارو د سمون ادارې د پولیسو د حقوقو نوی عمومي مدیر په دنده وګومارل شو
په دې اړه په جوړو شویو مراسمو کې، چې د ادارې د نظامي چارو مرستیال محترم لوی پاسوال قاري حبیب الله "بدر" او یوشمېر نورو ملکي او نظامي مسوولینو هم شتون درلود، محترم مولوي نیک محمد "منیب" د پولیسو د حقوقو د نوي عمومي مدیر په توګه کارکوونکو ته وپېژندل شو.
داراز، محترم لوی پاسوال قاري حبیب الله "بدر" د یادو مراسمو پرمهال خپلو خبرو کې وویل، په ادارو کې تغییر او تبدیل راځي چې موخه ترې د چارو ښوالی او پرمختګ دی نو هیله ده چې په دې برخه کې له ښاغلي مولوي منیب څخه ښې لاسته راوړنې ولرو.
همداشان، نوموړي د پولیسو د حقوقو د پخواني مدیر تېر خدمتونه او لاسته راوړنې وستایلې او له نوي مسوول څخه یې د اړوندو چارو د ښه پرمخ وړلو لپاره نه ستړې کېدونکو هلوځلو ته د دوام تر څنګ د دې امریت کارکوونکو ته د خپلو امر د اطاعت او د اداري چارو د ښه پرمختګ لپاره په ګډه د همکارۍ سپارښتنه وکړه.
په ورته وخت کې، د پولیسو د حقوقو نوي عمومي مدیر محترم مولوي نیک محمد منیب د زندانونو چارو د سمون ادارې له رهبرۍ څخه پر هغه د باور کولو مننه وکړه او زیاته یې کړه چې خپل مسوولیتونه به په ښه توګه ادا کوي.
ذوالحجة الحرام ۲۵/ ۱۴۴۵
د مقام د دفتر ریاست
د اطلاعاتو او عامه اړیکو امریت
