د روژې مبارکې میاشتې د رارسېدو په مناسبت د زندانونو چارو د سمون ادارې په اړوند زندانونو کې د قرآن عظیم الشان د ژباړې او تفسیر دوره پیل شوه
د زندانونو چارو د سمون ادارې د عمومي رئیس محترم الحاج مولوي محمدیوسف "مستري" په لارښوونه او د ادارې د ښوونې او بیا روزنې ریاست له لوري د روژې مبارکې میاشتې د رارسېدو په مناسبت د هېواد په یو شمېر زندانونو کې د قرآن عظیم الشان د ژباړې او تفسیر دوره پیل شوه.
د دغې ادارې د ښوونې او بیا روزنې رئیس محترم مولوي نظرمحمد "ناصري" په وینا، زندانونه مو د علم او اصلاح په مرکزونو بدل کړي او هڅه مو دا ده چې زندانیان د مؤمنو او متدینو اشخاصو په حیث خپلو کورنیو سره بیا یو ځای، ټولنې ته د خدمت جوګه او په راتلوونکي کې د جرم د اخته کېدو څخه وژغورو.
د یادونې وړ بولو، چې نوموړې اداره د دې ترڅنګ د ټولو زندانیانو لپاره د دیني، عصري او حرفوي زده کړو بیلابیل پروګرامونه جوړ کړي او لا هم دا لړۍ روانه ده، څو یې پرمټ زندانیان وکولای شي د بند تر مودې پایته رسېدو وروسته په راتونکي ژوند کې ترې مثبته ګټه پورته، له ناوړه کړنو لاس په سر او خپل هېواد ته د خدمت مصدر وګرځي.
شعبان المعظم ۲۳/ ۱۴۴۶
د مقام د دفتر ریاست
د اطلاعاتو او عامه اړیکو امریت
