د ا.ا.ا د مشرتابه د هدایت پر بنسټ د کور او ښار جوړونې وزیر په مشرۍ پلاوي د ننګرهار مرکزي زندان وکوت
د افغانستان اسلامي امارت د مشرتابه (حفظه الله) د هدایت پر بنسټ، د کور او ښار جوړونې وزیر محترم مولوي نجیب اللّٰه حیات "حقاني" په مشرۍ یو لوړ پوړي پلاوي د ننګرهار مرکزي زندان څخه لیدنه وکړله او د زندانیانو د وضعیت او هغوی ته د برابر شوو خدمتونو په اړه یې له نږدې معلومات ترلاسه کړل.
دغه راز، پلاوي د زندان بېلابېلې برخې وکتلې او د بندیانو د ساتنې، روغتیايي خدمتونو، زدهکړو، حرفوي پروګرامونو او نورو چارو وضعیت یې وارزاوه.
محترم مولوي نجیب اللّٰه حیات حقاني وویل، د اسلامي امارت د مشرتابه هدایت دا دی چې له زندانیانو سره د اسلامي اصولو او نافذه قوانینو په چوکاټ کې چلند وشي او د هغوی حقونو ته پوره پاملرنه وشي.
هغه وویل، که څه هم زندانیان د محکمې د قانوني پرېکړو له مخې له آزادۍ محروم دي، خو انساني کرامت او مشروع حقونه یې باید خوندي وساتل شي او مسوولین مکلف دي چې د هغوی د ساتنې او سمې روزنې په برخه کې خپلې دندې په ښه ډول ترسره کړي.
ورته مهال د ننګرهار د زندان رئیس محترم مولوي سهیل "سعید" راغلي پلاوي ته ښه راغلاست ووایه او د زندان د عمومي وضعیت او روانو فعالیتونو په اړه یې معلومات شریک کړل.
محترم مولوي سعید وویل، دا مهال په ننګرهار مرکزي زندان کې شاوخوا دوه زره کسان د بېلابېلو جرمونو په تړاو ساتل کېږي او د هغوی لپاره په بېلابېلو برخو کې اړین خدمتونه او اسانتیاوې برابرې شوې دي.
د نوموړي په وینا، د زندانیانو د زده کړو او مسلکي وړتیاوو د لوړولو لپاره دیني او عصري زده کړو، سربېره حرفوي او مسلکي روزنیز پروګرامونه هم روان دي، څو بندیان له خوشې کېدو وروسته د کار او حلالې روزۍ د ګټلو وړتیا ولري.
د کور او ښار جوړونې وزیر د زندان له بېلابېلو برخو تر لیدنې وروسته، د ننګرهار زندان د مسؤلینو له فعالیتونو او زندانیانو ته له برابر شوو اسانتیاوو څخه خوښي څرګنده کړه.
محترم مولوي نجیب اللّٰه حیات حقاني په زندان کې د زده کړو، حرفوي روزنې او نورو خدمتونو روان بهیر مثبت وارزاوه او ویې ویل چې د زندانیانو د اصلاح او ټولنې ته د هغوی د بېرته ورګرځېدو لپاره دا ډول پروګرامونه مهم رول لري.
نوموړي د زندان مسوولین وهڅول چې د مشرتابه د هدایتونو په رڼا کې خپلو چارو ته لا پاملرنه وکړي او د بندیانو د ساتنې او اصلاحي پروګرامونو بهیر په ښه توګه پر مخ یوسي.
ربیع لاول ۲۶/ ۱۴۴۸
د مقام د دفتر ریاست
د اطلاعاتو او عامه اړیکو امریت
