د ا.ا.ا. د زندانونو چارو د سمون ادارې عمومي رئيس په ترکيې هیواد کې د (ICPA) له عمومي رئيس سره وکتل
د افغانستان اسلامي امارت د زندانونو چارو د سمون ادارې عمومي رئيس محترم الحاج مولوي محمد یوسف "مستري" ترکیې هیواد ته خپل رسمي سفر په ترڅ کې د زندانونو د روزنې او اصلاح نړیوالې ټولنېی یا (ICPA) له عمومي رئيس محترم انیس یاووز "ییلدریم" سره وکتل.
په دې لیدنه کې دواړو لورو د افغانستان د زندانونو د کارکوونکو د مسلکي روزنې، د بندیانو د اصلاح، زدهکړې، کارموندنې او د هغوی د بوختیاوو لپاره د مناسب چاپېریال رامنځته کولو پر اړتيا مفصلې خبرې وکړې.
د (ICPA) عمومي رئيس د افغانستان د زندانونو چارو د سمون ادارې د هڅو ستاینه وکړله او د یادې ادارې رئيس او ورسره پلاوي د (ICPA) په ۲۷م نړیوال کنفرانس کې ګډون مهم وباله.
همداراز، محترم الحاج مولوي محمد یوسف "مستري" د (ICPA) له عمومي رئيس څخه مننه وکړله او له نوموړي څخه یې وغوښتل چې د افغانستان د زندانونو چارو د سمون اداره دې د راتلونکو کنفرانسونو او روزنیزو پروګرامونو په اجنډا کې شامله وساتل شي.
باید یادونه وکړو چې دغه لیدنه د دواړو لورو ترمنځ د همکارۍ د لا پیاوړتیا او په زندانونو کې د اصلاحي برنامو او روزنې په برخو کې د تجربو د تبادلې پر لور یو مثبت ګام بلل کېږي.
جمادي الاول ۱۱/ ۱۴۴۷
د مقام د دفتر ریاست
د اطلاعاتو او عامه اړیکو امریت
