د زندانونو چارو د سمون ادارې د پالېسۍ او مسلکي چارو مرستیال په افغانستان کې د سویس هېواد د همکاریو سازمان له استازي سره په خپل کاري دفتر کې ولیدل
د دې ادارې د پالېسۍ او مسلکي چارو مرستیال محترم قاري محمد بلال "فاتح" په داسې حال کې، چې د نوموړې ادارې د اقتصادي برنامو او ستراتېژیکو اړیکو رئیس محترم عبیدالله "اخلاص"، د ښوونې او بیا روزنې رئیس محترم مولوي نظر محمد "ناصري"او یو شمېر نورو مسوولینو هم شتون درلود، په افغانستان کې د سویس هېواد د همکاریو سازمان له استازي ښاغلي ایریک مارکلې سره ولیدل او د زندانیانو د ژوندانه د وضعیت، د هغوی د بشري حقونو د خوندیتوب او په نورو اړوندو موضوعاتو یې ورسره خبرې اترې وکړې.
همداشان، د پالېسۍ او مسلکي چارو مرستیال محترم قاري محمد بلال فاتح نوموړي پلاوي ته د ښه راغلاست وويلو ترڅنګ د یاد سازمان د همکاريو څخه مننه وکړله او وویل چې د زندانونو چارو د سمون ادارې اړوند زندانونه په اصلاحي او روزنیزو مرکزونو بدل شوي، د هغوي ټول شرعي او انساني حقونه خوندي او د دیني، عصري او حرفوي زده کړو زمینه هم ورته برابره شوې.
داراز، د پالېسۍ او مسلکي چارو مرستیال په مشرۍ پلاوي د سویس هېواد د همکاریو سازمان له استازي څخه د زندانیانو لپاره د مناسبې تغذیې، د روغتیایي تجهیزاتو، روغتیایي مراکزو او د متخصصو ډاکټرانو په ګومارنې، ښځینه زندانیانو ته د سپورت او بدني روزنې موادو برابرولو او د هغوی لپاره د روغتیا په برخه کې د اړینو توکو او موادو برابرول، د یادې ادارې تر چتر لاندې زندانونو ته د برېښنا لپاره د سولر سیستم جورولو او یو شمېر نورو برخو کې د همکارۍ غوښتنه وکړله چې د سویس هېواد د همکاریو سازمان له استازي ښاغلي ایریک مارکلې په مشرۍ پلاوي له لوري ورته د رسېدنې ډاډ ورکړل شو.
رجب المرجب ۹/ ۱۴۴۷
د مقام د دفتر ریاست
د اطلاعاتو او عامه اړیکو امریت
