د زندانونو چارو د سمون ادارې د مقام د دفتر رئیس او مل پلاوي د بامیان ولایت له زندانه لیدنه وکړله
د ادارې د مقام دفتر رئیس محترم قاري رحمت الله"ګلزاد"په داسې حال کې، چې د ولایتونو سره د اړیکو رئیس محترم مولوي عبد الحی " اخندزاده "او یو شمېر نورو مسوولینو یې هم ملتیا کوله، بامیانو ولایت ته د سفر په ترڅ کې د یاد ولایت د زندان رئیس محترم مولوي عبد الرحیم "احمد" سره پر اړوندو مسایلو خبرې اترې وکړې او هغوی ورته له خپله اړخه د دې زندان او زندانیانو لپاره د برابرو شویو امکاناتو او لازمو خدمتونو په هکله بشپړ معلومات ورکړل، چې د پلاوي مشر یې تر اورېدو وروسته د خوښۍ په څرګندولو د هغو د لاښه والي لپاره لارښوونې وکړې.
داراز، د مقام د دفتر رئیس او مل پلاوي یې د یاد زندان له زندانیانو سره هم له نږدې ولیدل، د هغوی غوښتنې یې واورېدې او د دې ولایت د زندان مسوولینو سره په خبرو کې د بندیانو لپاره د اسانتياوو پر زیاتولو، د هغوی غوښتنو ته د رسېدنې او د ښو خدمتونو پر وړاندې کولو ټینګار وکړ.
په پای کې، د زندانونو چارو د سمون ادارې د مقام د دفتر رئیس محترم قاري رحمت الله"ګلزاد په مشرۍ پلاوي د دې زندان د ښوونې او بیا روزنې، خوړو، اباتې، پخلنځي، تعمیراتي او روغتیايي چارې، امنیتي پوستې، ټاورونه او قراولونه وارزول او د شتو ستونزو د حل لپاره یې اړوند مسوولینو ته لازمې لارښوونې وکړې.
ذوالقعده ۲۳/ ۱۴۴۷
د مقام د دفتر ریاست
د اطلاعاتو او عامه اړیکو امریت
