د لوګر ولایت د زندان لپاره نوی امر په دنده وګومارل شو
د زندانونو چارو د سمون ادارې د پالېسۍ او مسلکي چارو مرستیال محترم قاري عبدالله "همدرد" په مشرۍ دعوت او ارشاد رئیس محترم مولوي صدیق الله "صدیقي" او د پالېسۍ او مسلکي چارو د معاونیت د دفتر امر محترم خلیل لله "بکتاش" په ګډون درې کسیز پلاوی لوګر ته په سفر ولاړ، او د ادارې له اړتیا سره سم یې محترم ملا رحمت الله " عمري" د دې ولایت د زندان د نوي امر په توګه د زندان پرسونل ته معرفي او نوموړي رسماً په دې بست کې خپله دنده پیل کړه.
په دې اړه د جوړو شویو مراسمو کې د ادارې د پالېسۍ او مسلکي چارو مرستیال د نوموړي ولایت د زندان د مخکیني مسوول کړنې او فعالیتونه وستایل او د یاد زندان له ملکي او نظامي پرسونل څخه یې له نوي امر سره د همکارۍ او په ګډه د چارو ښه پرمخ وړلو غوښتنه وکړه.
محترم قاري همدرد په خپلو خبرو کې وویل: «اوس مونږ ته ښه زمینه برابره شوې ده چې د خپل ولس خدمت وکړو څو الله (ج) او هغه بنده ګان را څخه راضي شي»
همداراز، د زندانونو چارو د سمون ادارې د پالېسۍ او مسلکي چارو مرستیال د دغه زندان
اداري شعبې، د تلاشۍ ځایونه، د سکن ماشینونو او د زندانیانو لپاره د خوړ ( اعاشې) اباتې، پخلنځی، برېښنا، تعمیراتي او روغتیایي چارو لیدلو ترڅنګ د زندانیانو ستونزې او غوښتنې له نږدې واورېدې او اړوندو مسوولینو ته یې د ستونزو د حل په موخه لازمې لارښونې وکړې.
محترم قاري همدرد لوګر ولایت د زندان مسوولینو سره په خبرو کې، د بندیانو لپاره د اسانتياوو پر زیاتولو، د هغوی ستونزو او روا غوښتنو ته د رسېدنې او د ښو خدماتو پر وړاندې کولو ټینګار وکړ او له زندانیانو سره یې د نوموړو مسوولینو ښه چلند وستایه.
صفر المظفر۲۴/ ۱۴۴۵
د مقام د دفتر ریاست
د اطلاعاتو او عامه اړیکو امریت
