د زندانونو چارو د سمون ادارې یوه پلاوي د خوست ولایت له زندانه لیدنه وکړه
د یادې ادارې د پالېسۍ او مسلکي چارو د مرستیال محترم قاري عبدالله "همدرد" په مشرۍ او د خدماتو رئیس محترم مولوي عبدالمالک "خاکسار" او د کابل ولایت د توقیفخونو د رئیس محترم قاري محمد ګل "جګرخون" په ګډون ټاکل شوي پلاوي، تېره ورځ خوست ته د خپل رسمي سفر په ترڅ کې، د دې ولایت د زندان له مسوولینو سره وکتل او پر اړوندو موضوعګانو یې خبرې اترې او سلا مشورې وکړې.
همداشان ، د محترم همدرد په مشرۍ پلاوي د خوست ولایت د زندان امنیتي پوستې، قراولونه، ټاورونه، اداري شعبې، پخلنځی، د خوړو، د څښاک پاکو اوبو سیستم او بېلا بېلې برخې وارزولې او د شتو نیمګړتیاوو او ستونزو د حل په موخه یې مسوولینو ته لازمې سپارښتنې وکړې.
داراز، پلاوي د نوموړي ولایت له زندانیانو سره په کتنه کې د هغوی ستونزي او غوښتنې له نږدې واورېدې، چې هغوی د پلاوي په ورتګ د خوښۍ تر څنګ د خپلو جرمي دوسیو د ژر څېړلو غوښتنه یې وکړه.
په ورته وخت کې، د پلاوي له لوري یادو زندانیانو ته ډاډ ورکړل شو چې په دې برخه کې به له عدلي او قضایي اورګانونو سره موضوع شریکه څو ژر تر ژره ورته رسېدنه وشي.
په پای کې، د زندانونو چارو د سمون ادارې د پالېسۍ او مسلکي چارو مرستیال محترم قاري عبدالله "همدرد" د دې زندان مسوولینو ته د زندانیانو لپاره د اسانتياوو د لا زیاتولو، ستونزو او روا غوښتنو ته یې د رسېدنې او د لا نورو ښو خدمتونو د وړاندې کولو سپارښتنه وکړه.
صفر المظفر۱۲\ ۱۴۴۵
د مقام د دفتر ریاست
د اطلاعاتو او عامه اړیکو امریت
