د زندانونو چارو د سمون ادارې په امنیتي غونډه کې پر یو لړ مهمو مسایلو خبرې وشوې
دغه غونډه، چې نن(دوشنبې) د یادې ادارې د نظامي چارو مرستيال محترم لوی پاسوال قاري حبیب الله "بدر" په مشرۍ او د نظامي چارو د معاونیت د ارکان رئیس محترم پاسوال مولوي اسدالله "مولانا"، د ادارې د نظامي ښوونې او روزنې واحدې قوماندنۍ قوماندان محترم مل پاسوال مولوي شرافت الله "حقاني" او د مرکزي بېلابېلو امنیتي برخو مسوولينو په ګډون جوړه شوې وه، په کې د اړوندو مسوولينو له خوا د مرکز او ولاياتو د زندانونو د امنيتي چارو او ترسره کړو فعالیتونو په هکله ریپوټونه وړاندې او په دې برخه کې د لازياتو تدابيرو لپاره ګټور بحثونه وشول.
دغه راز، د زندانونو يو شمېر امنيتي مسوولينو په غونډه کې له ځينو ستونزو، نيمګړتياوو او اړتیاوو يادونه وکړه، چې د ادارې د نظامي چارو د مرستيال له خوا ورته د حل او رسېدنې لپاره ژمنه وشوه.
همدا شان، محترم لوی پاسوال قاري حبیب الله "بدر" یو ځل بیا د ادارې پر نظامي پرسونل غږ وکړ چې د نظم او ډېسپلین رعایتولو او د نظامي یوینفورم استفادې ته په جدي توګه پاملرنه وکړي او ورسپارل شوي مسوولیتونه پروخت ترسره کړي.
په ورته مهال، د نظامي چارو د معاونیت د ارکان رئیس په خپلو خبرو کې د غونډې ګډونوالو ته وویل: « د زندانیانو لپاره د امنیت خونديتوب ستاسو دنده ده نو کوښښ وکړئ چې په ښه ترسره کولو سره یې هم الله (ج) او هم د هغه بنده ګان در څخه راضي شي».
داراز، د غونډې په پای کې د ټولو امنيتي مسوولينو او پرسونل ترمنځ یې د کارونو لا ښه پرمختګ لپاره د پوره همغږۍ او همکارۍ زیاتولو په هیله د خیر دعا وشوه.
صفر المظفر ۱۱/ ۱۴۴۵
د مقام د دفتر ریاست
اطلاعاتو او عامه اړیکو امریت
