د زندانونو چارو د سمون ادارې عمومي رئیس د ننګرهار ولایت د زندان له زندانیانو سره په لیدنه کې: زندان د محکومینو د اصلاح او روزنې ځای دی
محترم مولوي محمد یوسف"مستري" تېره ورځ د یادې ادارې د نظامي چارو د معاونیت د رئیس ارکان محترم پاسوال مولوي اسدالله "مولانا" په ملتیا ننګرهار ته سفر وکړ، د هغه ولایت د زندان وضعیت یې و ارزاوه او له مسوولینو سره یې هم پر اړوندو مسایلو خبرې اترې وکړې.
داراز، د زندانونو چارو د سمون ادارې عمومي رئیس د نوموړي ولایت د زندان له زندانیانو سره هم ولیدل او د هغوی د ستونزو تر اورېدو وروسته یې وویل، « موږ ډېر کوښښ کړی چې اصلاحي او روزنیز پروګرامونه عملي کړو، نو هیله لرم چې له یوې خوا دا پروګرامونه په زندان کې ستاسو د اصلاح او بیا روزنې لامل شي او له بلې خوا تاسو هم ترې له بدو او ناروا کړنو څخه د ډډه کولو لپاره ګټه واخلئ او هم له بنده وروسته د یو سالم وګړي په توګه خپلې کورنۍ او ټولنې سره یو ځای شئ ».
په ورته وخت کې، د ننګرهار ولایت د زندان زندانیانو د محترم مولوي محمدیوسف "مستري" په مشرۍ د پلاوي په ورتګ خوښي وښوده او له دوی سره د زندان د مسوولینو چلند یې مثبت یاد کړ، خو د خپلو جرمي دوسیو د ژر څېړلو موضوع یې یوه له مهمو او روا غوښتنو وګڼله، چې د پلاوي له خوا ورته ډاډ ورکړل شو چې دا غوښتنه به یې عدلي او قضايي اورګانونو سره شریکه کړې، څو ورته پروخت رسېدنه وشي.
په ورته مهال، د زندانونو چارو د سمون ادارې د عمومي رئیس په مشرۍ پلاوي د نوموړي زندان د ډوډۍ پخولو، خوړو پخولو، اباتې، د برېښنا خدمت وړاندې کولو او تعمیراتي،روغتیايي چارې، امنیتي پوستې،ټاورونه او قرولونه له نږدې وارزول او د هغو لا ښه والي او شتو ستونزو د هواري په موخه یې مربوطه مسوولینو ته لازمې سپارښتنې وکړې.
محرم الحرام ۸/ ۱۴۴۵
د مقام د دفتر ریاست
د اطلاعاتو او عامه اړیکو امریت
