د کابل ولایت د شکردرې ولسوالۍ توقیفخونه د ۸ کاله ځنډ وروسته بیرته فعاله شوه
د زندانونو چارو د سمون ادارې د عمومي رئیس محترم الحاج مولوي محمد یوسف "مستري" په سپارښتنه او اړتیا ته په کتو سره سم، د کابل ولایت د توقیفخونو د رئیس محترم قاري عبدالغني "عادل" په هڅو د دې ولایت د شکردرې ولسوالۍ توقیفخونه د ۸ کاله ځنډ وروسته بیرته فعاله او ګټې اخیستنې ته و سپارل شوه.
په ورته وخت کې، محترم عادل په خپلو خبرو کې وویل:« د یادې توقیفخونې د بیا رغونې چارې په ښه او میعاري توګه رغول شوې دي چې له دې سره به د شکردرې ولسوالۍ ترڅنګ د استالف، ګلدرې، فرزې، قره باغ او د میربچه کوټ ولسوالیو توقیفیانو هم دلته راوړل او ساتل کیږي.
نوموړي زیاته کړه چې یاده توقیفخونه د ۶۰ تنو پورې د توقیفیانو د ساتنې ظرفیت لري چې تر ډیره بریده به د یادو ولسوالیو د توقیفیانو ستونزې هوارې او چارو ته به یې په وخت رسېدنه وشي.
ذوالقعده ۲۵/ ۱۴۴۴
د مقام د دفتر ریاست
اطلاعاتو او عامه اړیکو امریت
