د زندانونو چارو د سمون ادارې نظامي مرستیال د دې ادارې د وسایطو د ترمیم له تخنیکي ورکشاپه ارزونه وکړله
محترم لوي پاسوال الحاج محمد کاظم "طارق" په داسې حال کې، چې د یادې ادارې د مالي او اداري عمومي رئیس محترم مولوي عبدالهادي "مالي اخندزاده"، د ښوونې او بیا روزنې رئیس محترم مولوي نظر محمد "ناصري" او یو شمېر نورو مسوولینو یې هم ملتیا کوله د دې ارزونې پرمهال، په نوموړي ورکشاپ کې د وسایطو د ترمیم د څرنګوالي په اړه له اړوندو مسوولینو او تخنیکي او فني کارکوونکو سره خبرې وکړې، د هغوی ستونزې او غوښتنې یې واوریدې او د حل په موخه یې اړوندو مسوولینو ته لازمې سپارښتنې وکړې.
د زندانونو چارو د سمون ادارې نظامي مرستیال زیاته کړله، د دې ورکشاپ کارکوونکي باید د ادارې د وسایطو د ترمیم لپاره خپلې هڅې لا ګړندۍ کړي، څو په ټرانسپورټي برخه کې خنډ رامنځته نه شي او چارو ته پروخت رسېدنه وشي، له لږو امکاناتو څخه ډېره ګټه پورته شي، چې نوموړو کارکوونکو هم له خپله اړخه د ادارې نظامي مرستیال ته پر یادو لارښوونو د عمل کولو ژمنه وکړله.
شوال المکرم ۲۶/ ۱۴۴۷
د مقام د دفتر ریاست
د اطلاعاتو او عامه اړیکو امریت
