د اسلامي همکاریو سازمان د زندانونو چارو د سمون ادارې سره د یوه امبولانس مرسته وکړله
د زندانونو چارو د سمون ادارې عمومي رئیس محترم الحاج مولوي محمدیوسف "مستري" او په افغانستان کې د اسلامي همکاریو سازمان (OIC) سفیر ډاکټر محمدسعید "العیاش" ترمنځ نن(چهارشنبې) د یوه هوکړه لیک په لاسلیکولو سره د یاد سازمان له خوا په ټولو اړوندو او اړینو طبي وسایلو سمبال امبولانس دغې ادارې ته وسپارل شو.
د زندانونو چارو د سمون ادارې عمومي رئیس په دې اړه د جوړو شویو مراسمو پرمهال چې د دې ادارې یو شمېر رییسانو هم شتون درلود وویل، د اسلامي همکاریو سازمان تل له دغې ادارې سره په مختلفو برخو کې د مرستو ژمنه کړې او عملي کړې یې دي، چې د هغه په خبره یاد امبولانس هم د دوی د انسان پالنې حس پر بنسټ مرسته شوی او دا دی دې ادارې ته وسپال شو.
یاده مرسته، چې د زندانونو چارو د سمون ادارې د ستراتېژیکو اړیکو ریاست په همغږۍ چمتو شوې د کابل ولایت د څرخي پله مرکزي زندان د ښځینه محبوسو ناروغانو د بېړني حالت لپاره ترې ګټه اخیستل کېږي.
په ورته وخت کې، په افغانستان کې د اسلامي همکاریو سازمان سفیر محترم ډاکټر محمد سعید "العیاش" هم په راتلونکو کې د ورته نورو مرستو او همکاريو د دوام ډاډ ورکړ.
رجب المرجب ۳/ ۱۴۴۷
د مقام د دفتر ریاست
د اطلاعاتو او عامه اړیکو امریت
