ولایتي خبر(ننګرهار) د ننګرهار مرکزي زندان څخه سلګونه تنه زندانيان خوشې شول
د سترې محکمې د فرمان پر بنسټ د لوی اختر په مناسبت (۳۱۷) تنه زندانیان خوشې او (۳۸۵) تنو نورو ته د بند به موده کې تخفیف ورکړل شو.
په همدې مناسبت جوړو شويو مراسمو کې، د دې ولایت د زندان رئیس محترم مولوي سهیل "سعید" خوشې شويو زندانيانو ته په خپله وینا کې وويل: هغه دیني، عصري او حرفوي زده‌کړې چې مو د بند په موده کې ترلاسه کړي، بايد په خپل ورځيني ژوند کې یې عملي کړی او په راتلوونکې کې د جرمونو څخه ځان وساتی.
همداراز د زندانونو چارو د سمون د اداري د عفوي او تخفيف د فرمانونو د پلي کولو امر محترم مولوي شهیداللّٰه "خالد" د سترې محکمې د (۹۵۸۴) ګڼه فرمان ولوست، او د دغه فرمان د دقیق پلي کېدو په اړه یې هر اړخیزې څرګندونې وکړې.
نوموړي وویل: چې دغه فرمان د اسلامي عدالت له روحیې سره سم صادر شوی او د زندانيانو د اصلاح او بېرته ټولنې ته د ورګرځېدو یوه مهمه برخه ده.
د يادونې وړ ده، د اخترونو په مناسبت د اسلامي امارت د رهبرۍ له لوري زندانیانو ته د عفوې دا ډول فرمانونه د شفقت او اصلاح سیاست څرګندونه کوي، ترڅو هغوی د ټولنې سالمو غړو په توګه بېرته خپل ژوند ته را وګرځي.
ذوالحجة الحرام ۳/ ۱۴۴۶
د مقام د دفتر ریاست
د اطلاعاتو او عامه اړیکو امریت
