د کابل ولایت د څرخي پله د مرکزي محبس د پرسونل او محبوسینو د ټېمونو ترمنځ د والیبال دوستانه سیالۍ ترسره شوه
دغه سیالۍ چې د زندانونو چارو د سمون ادارې د ښوونې او بیا روزنې ریاست له لورې په لاره اچول شوې وه په جوړو شویو مراسمو کې یې د ښوونې او بیا روزنې رئیس محترم مولوي نظرمحمد "ناصري" په داسې حال کې چې د دې ادارې د نظامي ښوونې او روزنې واحدې قوماندانۍ قوماندان محترم مل پاسوال مولوي نورالله "دروېش" او یو شمېر نورو مسولینو او مینه والو محبوسینو شتون درلود په خپلو خبرو کې وویل چې په زندانونو کې یې د زندانیانو لپاره مختلف ښونېز روزنیز او ورزشي پروګرامونه برابر کړي څو یې له بې ځایه وخت تېرېدو څخه مخنوی وشي او ډیر څه لاسته راوړي.
داراز، نوموړي یادو محبوسینو ته زیاته کړله، چې ستاسو د ورزشي برخې د لا پیاوړتیا لپاره مو تجربه لرونکي روزونکي ګومارلي او ډېر ژر به ستاسو روزنه پیل کړي.
داراز، د نظامي ښوونې او روزنې واحدې قوماندانۍ قوماندان محترم مل پاسوال مولوي نورالله دروېش په خپلو خبرو کې وویل، چې د زندانونو چارو د سمون ادارې له لوري زندانیانو ته ټول سهولتونه برابر شوي څو نوموړي په غوره چاپېریال کې خپله د بند موده پای ته ورسوي.
د دې سیالۍ په پای کې د کابل ولایت د څرخي پله د مرکزي محبس محبوسینو ۰-۲ د کابل ولایت د مرکزي محبس د پرسونل ټیم ته په ماتې ورکولو سره بریا خپله کړله.
هېره دې نه وي، چې د دې سیالۍ په وروستېو کې د لوبغاړو د لا هڅونې په موخه ورزشي توکي او مننلیکونه هم ورکړل شو.
ذوالقعده ۱۴/۱۴۴۶
د مقام د دفتر ریاست
د اطلاعاتو او عامه اړیکو امریت
